Nabunyagan og tungason ug kulbahinam nga daog ang Cebu Classics batok sa Caloocan, 77-76, niadtong Huwebes sa gabii, Marso 13, 2025, sa 1xBet-Maharlika Pilipinas Basketball League (MPBL) 2025 Season sa Pasay Astrodome.
Si Limuel Tampus nagpakatap og 16 puntos aron agakon ang Classics sa kasamtangang labing dakong pagbangon gikan sa pagkalubong ning maong torneyo, nga gikombatihan og 30 ka teams.
Adunay higayon sa kombati nga nalubong ang Classics og 21 puntos, 46-65.
Human niini, gidugkatan ni Tampus ang 21-2 nga rally sa Classics nga maoy nakapahak og dako sa labaw sa Caloocan, 66=67.
Grabe na ka sikit ang kombati human niini ug kanunay nga ninggamit og full court press ang Classics hangtod na sa katapusang gutlo.
Sa katapusang 11 ka mga puntos sa Classics, pito ang natampo ni Tampus.
“Si Boss Voltaire nagsabi sa team to full court press,” matod ni Mike Reyes, usa sa assistant coaches sa Classics.
Si Tampus, kinsa na-recruit sa Classics gikan sa Davao, maoy nahatagan sa best player award.
Nidugang og 14 puntos si Rashawn McCarthy alang sa Classics samtang ning-amot og 12 puntos ug 15 rebounds si Mark Meneses.
Ang sunod nga misyon sa Classics mao ang pagpakigbatok sa Quezon Huskers karong Lunes, Marso 17. / JBM, ESL