Hugtanong gipanghimakak sa 36 anyos nga lalaki ang pasangil nga siya niunay og lugos sa anak sa iyang kapuyo nga menor de edad.
Nasayran nga si Rey (tinuod nga ngan gipugngan aron pagpanalipod sa identity sa menor) boluntaryong nitahan ngadto sa Dalaguete Police Station human siya nasayod nga adunay pending nga warrant of arrest batok kaniya.
Nalutsan si Rey og warrant of arrest niadtong Oktubre 2023 kalabot sa duha ka kasong pagpanglugos.
Sumala pa niya sa dihang nahinabi sa Superbalita Cebu nga wa siya masayod nga aduna siya'y warrant, ug niadtong miaging semana lang sa dihang nanawag siya sa iyang kabanay kay namatay ang iyang inahan.
Gipahibawo siya nga adunay nangita kaniya.
Si Rey, taga Carcar City, negosyante, nisurender sa Dalaguete Police Station niadtong Mayo 3, 2024 sa gabii.
“Sa mga tuig 2022 – 2023 nabuang na siya (biktima) og suroy-suroy tungod sa iyang mga amiga... nakit-an sa akong bayaw nga nakadlawnan sa diversion road sa Barili ug giingnan ko, mao to akong giapas sakay sa akong motor, aron ma safe.
“Nagrebelde na siya tungod sa akong pagbadlong kaniya,” saysay ni Rey.
Dugang pa niya nga iyang atubangon ang pasangil ug ang pagpamatuod nga wa siya mohimo sa ingon. / DVG