PERSONAL nga nanghatag og hinabang sa mga nasunogan sa Barangay Labogon, Dakbayan sa Mandaue si Senador Bong Go niadtong Miyerkules, Hunyo 18, 2025.
Ang mga hinabang naglangkob sa mga food packs, hygiene kits, pinansyal nga tabang, ug uban pang mga relief goods nga gihatag ngadto sa mga biktima sa sunog sa pagtambayayong sa buhatan ni Congresswoman Girlie Veloso sa Malasakit at Bayanihan Party-list, sa City Social Welfare Services (CSWS), ug sa mga lokal nga opisyal.
“Ang serbisyo dapat dili lang sa panahon sa eleksiyon kondi kanunay,” ingon sa senador ngadto sa mga residente atol sa kalihukan nga gipahigayon sa covered court sa barangay.
Gipahimuslan sab niya ang kahigayunan sa pagpasalamat sa mga Sugboanon kay siya ang top-performing senatorial candidate sa Cebu atol sa miaging eleksyon.
“Daghang salamat sa inyong pagsalig. Diri ko nag-number one, mao nga magpadayon ko sa pagserbisyo,” matod ni Go.
Kahinumdoman nga usa ka sunog ang niulbo niadtong Hunyo 11 sa Sitio Canumay, Barangay Labogon.
Ang maong sunog nilamoy sa 60 ka balay ug nakaapektar sa labing minos 227 ka indibiduwal.
Pipila ka pamilya ang nagpabilin sa mga temporaryong pinuy-anan samtang nagpaabot sa relokasyon ug tabang sa pabalay.
Si Senador Go maoy principal author sa Malasakit Center Act, nisubli sa iyang pasalig sa pagsiguro nga ang serbisyo sa gobiyerno ilabi na ang tabang medikal, magpabilin nga accessible sa mga kabus.
Niuban kaniya si Kongresista Girlie Veloso nga nipahibalo sa mga plano pagtukod og dugang Malasakit Centers sa tibuok Probinsiya sa Sugbo aron palapdan ang access sa tabang sa panglawas alang sa mga pasyenteng nanginahanglan.
Bisan og wala giklaro ni Veloso kon pila ka bag-ong centers ang ablihan, iyang gibutyag ang panginahanglan sa pagpalapad sa programa, ilabi na sa mga lugar nga ang mga tawo naglisod sa pag-access sa tabang medikal sa gobiyerno.
Sa kasamtangan, adunay mga Malasakit Centers nga nag-lihok sa Probinsiya sa Sugbo nga nahimutang sa Mandaue City, Lapu-Lapu City, Cebu City, Talisay City, ug Carcar City.
“Dako kaayo’g tabang ang Malasakit Centers sa mga kabos nga pasyente. We want to bring more of these centers closer to those who need them most,” ingon ni Veloso.
Matod ni Go nga ang iyang pagbisita kabahin sa padayon nga paningkamot sa dali nga pagtubag sa mga katalagman ug pagsiguro nga ang mga komunidad makadawat og dinaliang tabang. / CAV