Kadtong 126 nga pamilya sa Mandaue City makadawat og hinabang pinansiyal human nga ang ilang balay naugdaw sa sunog nga niulbo sa duha ka managlahing barangay.
Ang sunog nga nahitabo sa Sitio Pokang, Barangay Looc, ug Purok Orchids sa Barangay Opao niadtong Biyernes, Enero 24, 2025.
Matod ni City Councilor Jennifer Del Mar, chairperson sa Committee on Disaster Risk Reduction and Management, nahinabi niadtong Lunes, Enero 27, nagkanayon nga ang mga pamilya kansang mga balay nga partially burn makadawat og P5,000, samtang ang mga pamilya nga ang balay hingpit nga naugdaw ang adunay madawat nga P10,000.
Sa Barangay Looc, usa ka balay ang partially burn ug 49 ka mga balay ang hingpit nga nasunog. Sa Barangay Opao, 51 ka mga balay ang hingpit nga naabo nga nakaapekto sa 477 ka mga tawo.
Gibutyag ni Del Mar nga ang City Social Welfare Services (CSWS) maoy magdumala sa pag-apudapod sa pinansyal nga tabang alang sa mga naapektuhan nga pamilya.
Dugang pa, hatagan usab og burial assistance nga nagkantidad og P10,000 ang pamilya nga namatyan kadtong 62-anyos nga babaye nga nakaangkon og first-degree sa iyang tuo nga bukton. Rason sa iyang pagkamatay mao ang acute myocardial infarction.
Gikumpirma ni Councilor Jimmy Lumapas ang tabang sa paglubong nga gibutyag usab nga posible pang madugangan ang kantidad kon kinahanglanon.
"P10,000 ang tabang sa paglubong nga among ihatag, ug kini usa ka dako nga kantidad. Puwedi pa nato madugangan ang tabang kon kinahanglan," matod ni Lumapas.
Ang mga biktima gibutang karon sa evacuation centers sa mga gym sa Barangay Looc ug Opao.
Ang sunog nagbilin og P3.25 milyunes nga kadaot sa kabalayan ug kabtangan. / CAV