Gianunsyo sa Samahang Weightlifting ng Plipinas (SWP) nga anhi sa Dakbayan sa Sugbo ipahigayon ang 2024 National Weightlifting Open karong Hunyo 9-15 sa Cube Wing sa SM Seaside City.
Mismong si SWP president Monico Puentevella ang nipahibalo niini sa usa ka press conference kagahapon sa SM Seaside City admin office.
Matod ni Puentevella nga kapin sa 300 ka batan-ong weightliffters ang magtigi sa nagkadaiyang weight categories sa labing dakong weightlifting competition sa nasod.
Malaumon si Puentevella nga ning maong kompetisyon, makadiskubre ang nasod og sumosunod sa lakang sa bantugang weightlifter sa nasod nga si Hidilyn Diaz, kinsa maoy bugtong pa lang nakatunol sa Pilipinas og Olympic gold medal.
Sa wala pa siya nakig-atubang sa media, gisusi una ni Puentevella ang venue kauban sila si Cebu City Sports Commission (CCSC) chairman John Pages, SWP chairman Mark Alino ug SWP official Alex Pacquiao. / ESL