Human sa kapin sa tuig nga nangawad-an sa ilang trabaho ang kapin 3,000 ka mga trabahante gikan sa 10 ka kompaniya sa Dakbayan sa Lapu-Lapu, ang Department of Social Welfare and Development (DSWD) 7 nihatag nila og tag P3,000 nga cash assistance sa Lunes, Marso 24, 2025.
Si DSWD 7 Social Welfare Officer II, Sandra Rose Monterona, nitug-an sa mga reporter niadtong Lunes, Marso 24, 2025, nga ang cash assistance ubos sa Assistance to Individuals in Crisis Situation (AICS) program. Matod niya nga ang 3,327 ka mga nawad-an og trabaho nalista ug dunay endorsement letters nga giduso sa City Public Employment and Service Office (Peso), sukad sa Disyembre 2023, 2024, ug sa bag-o sa 2025 gikan sa mga private company.
Gitataw ni Monterona nga ang pagpanghatag sa AICS cash assistance nalangay tungod sa dugang request nga maapil sa lista sa 2025 aron masiguro ang pundo gikan sa ilang Central Office.
Dugang niyang pagpasabot nga ang pundo gi-request sa 2025 tungod sa nagpadayong pagpanaktak sa Mactan Export Processing Zone (MEPZ) ug dugang endorsement letters, apil na ang listahan sa gipangtaktak nga gipadala sa DSWD karong tuiga.
Si Kim Francisco, ang Peso head sa Lapu-Lapu nibutyag nga ang beneficiary mga natangtang sa trabaho gikan sa duha ka pribadong kompaniya sa Lapu-Lapu City ug MEPZ diin kadaghanan gikan sa manufacturing sectors.
“They have waited over a year for this assistance, with some fortunate to wait only a few months. We are thankful that DSWD 7 responded to the Lapu-Lapu City Government’s request through Peso to help those who lost their jobs,” matod ni Francisco.
Duha ka dapit sa Lapu-Lapu ang gihimuan sa pagpanghatag sa cash assistance, sa Barangay Poblacion nga dunay 1,690 ug sa City Auditorium nga niabot og 1,637 ang nakadawat. / DPC