Sugdan sa Los Angeles Lakers ang ilang pagdepensa sa National Basketball Association (NBA) Cup o gitawag og in-season tournament karong Nobiyembre 16, 2024 (PH time) pinaagi sa pag-asdang sa korte
sa San Antonio Spurs.
Kini basi sa bag-ong eskedyul sa in-season tournament nga gipagawas sa NBA kagahapon, Miyerkules, Agusto 14, 2024.
Ang tanang eskedyul sa NBA 2024-25 season ipagawas sa liga karon pang Biyernes, Agusto 16, 2024.
Sa niaging season, ang Lakers ningharos pagdaog sa tanan nilang pito ka mga duwa sa in-season tournament aron angkunon ang kampyunato.
Sa in-season tournament, ang tanang miyembrong teams gibahin sa unom ka mga grupo diin tag tulo sa Eastern Conference ug Western Conference alang sa group stage.
Ang matag grupo langkuban og tag lima ka teams nga mosagubang og upat ka mga duwa sa single-round robin group stage.
Ang unom nga mopatigbabaw sa matag grupo makaabante sa knockout quarter-finals kauban ang duha ka wildcard teams.
Ang wildcard teams mao ang adunay labing maayong rekord sa tanang 2nd placers sa East ug West.
Ang tanang mga duwa sa in-season tournament gawas lang sa championship game maapil sa kuwenta sa regular season diin 82 ka mga duwa ang sagubangon sa matag team.
Lakip sa giatangang mga duwa sa in-season tournament mao ang pagbalik ni Klay Thompson sa korte sa Golden State Warriors apan sul-ob na ang uniporme sa Dallas Mavericks karong Nobiyembre 13, 2024. / AP