Igo lang nakahakot og 8.76 million average viewers ang Game 2 sa 2024-25 National Basketball Association (NBA) Finals series, labing ubos nga nahakot sa Game 2 nga duwa sa finals sa niaging 18 ka tuig, wala’y labot ang duwa sa 2020 COVID-19 global pandemic.
Sa gitumbok nga duwa, bangis nga gibawsan sa host Oklahoma City Thunder ang Indiana Pacers, 123-107, aron tablahon ang best-of-seven series, 1-1.
Ang average viewers ning maong sangka nius-os og 30 porsiyento kumpara sa niagng season diin nagparang ang Boston Celtics ug Dallas Mavericks sa finals.
Ang Game 1 sa series diin niposte og makapakugang nga kadaugan ang Pacers pinaagi sa jumper ni Tyrese Haliburton sa nahabiling 0.3 segundos, nakahakot og 9.9 million average viewers.
Adunay higayon nga niabot pa og 11 million average viewers ang Game 1.
Ang nag-unang duha ka mga duwa sa kasamtangang finals series nakahakot og 8.84 average viewers nga ubos og 24 porsiyento kumpara sa niaging tulo ka seasons. / Gikan sa wires