Sugdan karong Biyernes, Hunyo 6, 2025 sa alas 8:30 sa buntag (PH time), ang 2024-25 National Basketball Association (NBA) Finals tali sa host Oklahoma City Thunder ug Indiana Pacers sa Paycom Center sa Oklahoma City.
Ning maong finals series, adunay mga kritiko nga ningkuwestiyon sa kapabilidad sa Thunder ug Pacers kon nganong naabot sila ning puntoha basi sa taho sa AP News. Tataw nga nahagit niini ang duha ka mga kampo.
Ang tagsatagsa ka lider sa duha ka mga kampo nga sila si Shai Gilegous-Alexander sa Thunder ug Tyrese Haliburton sa Pacers parehong wala nakahimo og grabeng kisaw sa ilang pagsulod sa liga, dili sama sa nasinati ni LeBron James ug uban pang superstars sa liga.
Si Alexander gipili sa Charlotte Hornets isip 11th overall pick niadtong 2018 rookie draft apan sa samang adlaw, gi-trade dayon siya sa Hornets ngadto sa Los Angeles Clippers.
Niadtong 2019, gi-trade sa Clippers si Gilegous-Alexander sa Thunder ug niining higayuna, nagsugod na paghimo og dakong pangalan ang Canadian superstar.
Sa iyang bahin, si Haliburton gipili sa isip 12th overall pick sa Sacramento Kings niadtong 2020 draft.
Niadtong 2022, gi-trade sa Kings si Haliburton ngadto sa Pacers ug ning higayuna, nagsugod na sab paghimo’g dakong pangalan si Haliburton.
Kining tanan tipik na lang sa kasaysayan ug gitubag nila ni Gilgeous-Alexander ug Haliburton ang mga kritiko pinaagi sa pag-agak sa ilang teams sa NBA Finals.
Nahitabo kini bisan adunay undrafted players sa ilang rotasyon ang Thunder ug Pacers.
“Staying true to who we are is the reason why we’re here. If we want to keep having success, we have to be who we are. It’s just who we are, no matter the moment,” matod ni Gilgeous-Alexander nga napatik sa AP News.
“I’ll continue to tell you guys in certain moments that it doesn’t matter what people say, but it matters — and I enjoy it,” asoy sab ni Haliburton.
Ang Pacers nagtinguha sa ilang labing unang kampyunato ug kon buot hunahona, mao sab kini ang sitwasyon sa Thunder.
Ang prangkisa sa Thunder nakakuha og titulo niadtong 1979 apan nagduwa pa ang team isip Seattle Supersonics. / Gikan sa wires