Kulbahinam nga duwa ang gipakita sa Indiana Pacers ug Oklahoma City Thunder sa National Basketball Association (NBA) Game 1 Finals, apan bisan pa niini nakakuha og ubos nga viewing rating ang liga.
Ang unang duwa sa 2025 NBA Finals nakakuha lang og 4.7 nga rating ug 8.91 milyones ka viewers sa ABC, base sa datos sa Sports Media Watch. Kini ang labing ubos nga rating para sa Game 1 sukad pa sa 1988, gawas lang sa Covid-19 seasons sa 2020 ug 2021.
Mas ubos ni og 18 porsiyento sa ratings ug 19 porsiyento sa total viewers itandi sa opening game sa finals niadtong miaging tuig nga nag-abot ang Boston Celtics ug Dallas Mavericks. Basin mas grabe pa unta ang pagkalubong kung wala pa nakapaulbo og dako nga comeback si Tyrese Haliburton ug ang Pacers sa katapusang minuto para pildihon ang inilog nga Thunder.
Nikatag-an na man sab daan ang uban nga mohinay gyud ang ratings kay gikan man sa ika-25 ug ika-47 nga pinaka-gamay nga market base ang duha ka teams, base sa Nielsen rankings.
Pero malaumon ang liga kay sugod palang kini sa nindot nga matchup.
Gi-highlight pud sa PR team sa NBA ang mga positibong butang. Mao kini ang pag-abot ngadto sa viewership sa 11 milyones pagkahuman sa game-winner ni Haliburton nga gibuhat sulod sa 0.3 segundos, lig-on nga suporta gikan sa mga 18–34 anyos nga edad, ug record-breaking nga mga tan-aw sa social media.
Midaog ang Indiana batok Thunder sa Game 1, 111-110, pinaagi sa winning-shot ni Tyrese Haliburton nga nakapakugang sa basketball world tungod kay grabe man kainilog ang Thunder sa maong series.
Ang Game 2 didto gihapon duwaon sa Oklahoma City karong Lunes (PH time)./ RSC