Sud na sa usa ka semana nga ‘missing’ pa gihapon ang negosyante nga taga-dakbayan sa Lapu-Lapu ug laing duha ka mga kauban niini.
Katapusang nakit-an ang mga biktima nga gipasakay sa pito ka tawo ngadto sa puti nga van niadtong Dominggo, Marso 3, 2024 sa alas 9:00 sa gabii sa Diamond St., Santa Teresita, Barangay Tisa, Cebu City.
Si Jason King Ababo, 41, taga-Barangay Basak, dakbayan sa Lapu-Lapu, nagnegosyo og buy and sell nga mga sakyanan wala pa igkita atol niining pagsuwat sa balita.
Ang kabanay ni Ababo nangayo og panabang sa publiko pinaagi sa social media.
Si Jason, gikatahong gipasakay ngadto sa kolor puti nga van nga dunay mga nagmotorsiklo nga kauban.
Samtang wala sab mailhi ang laing duha ka mga lalaki nga gidala.
Si Louie Abapo, igsoon ni Jason,nibutyag sa Superbalita Cebu nga March 3, 2024 (Dominggo) sa alas 4:00 sa hapon mibiya sa ilang panimalay sa Lapu-Lapu.
Wala na sab makit-i iyang motorsiklo nga may plate number 0701-1120633 Yamaha Aerox (orange/black) ug dili na makontak ang selpon.
Nanghinaot sila kon kinsay nakakita mokontak sa ilang selpon numbers; 09065956822 -Louie Abapo, 09064405465 -Bong Abapo, 09696487700 Kakam Bacalso ug 09565924098 Phing Abapo. / GPL