Bisan nahuman na ang holiday season, nagpabilin gihapon’g taas ang presyo sa suplay sa manok dinhi sa Sugbo.
Kini’ng maong sitwasyon nakaapekto sa mga naninda og friend chicken sanglit gamay na lang ang ilang ginansiya.
Matod sa usa ka negosyante nga nihangyo nga dili magpaila sa dihang giinterbyu sa SunStar Cebu sa Huwebes, Enero 16, 2025, nga ang pagsaka sa presyo sa karne sa manok ug ang pagnihit sa suplay niini adunay dakong epekto kanila’ng mga gagmay’ng negosyo nga nagsalig sa barato nga stock aron mamintinar ang ilang ginansya.
“Actually kon tag P170 almost 40 percent ang among profit unya karon nga P210 na, mga 20 to 30 percent na lang unya kuhaan pa sa expenses like gasul ug mantika, so, down gyud ang mga negosyante kon tag P200 plus gihapon,” nagkanayon ang negosyante.
Sa wala pa ang Nobiyembre 2024, ang tibuok nga manok mapalit sa kantidad nga P170 matag kilo.
Apan tungod kay nisaka ang presyo ngadto sa P210 matag kilo ug P230 sa chicken parts, ingon man LPG ug mantika nga nisaka gikan sa P170 ngadto sa P195 kada kilo, nius-os ang ginansiya sa mga negosyante sa 20 ngadto sa 30 porsyento.
Ang maong vendor niingon nga bisan pa sa kamahal sa manok, nagpabilin ang presyo sa iyang fried chicken gikan sa P25 ngadto sa P35 sukad siya nagsugod niadtong Hulyo sa miaging tuig.
Siya nidugang nga kinahanglan nga magpabilin siya sa naandan nga presyo tungod sa kompetisyon.
Sa laing bahin, usa ka staff gikan sa ICY’s Crispy Chicken sa may dan Junquera sa Siyudad sa Sugbo ang nipaambit sa susamang mga kabalaka sama sa pagkalangan sa delivery sa manok sa ilang tindahan tungod sa kanihit sa suplay.
Matod niya nga kon kini magpadayon, hayan mapugos sila pagpanirado tungod sa kakulang sa stock.
“Nimahal man ang manok unya menos pud ang suplay karong panahona. Tagbaw mi og pangita gani og mga manok run,” matod sa staff kinsa nihangyo nga dili nganlan.
Matod sa staff nga kasagaran makabaligya sila og moabot 50 kilos nga fried chicken kada adlaw sa ilang lima ka outlets sa Dakbayan sa Sugbo.
Apan sukad niadtong Nobiyembre diin nagnihit ang suplay sa manok, nimenos na ang ilang halin.
“Ang orderon namo kay tibuok manok man gyud, karon mo-order nami og by parts usahay, unya mas mahal,” matod sa staff. / CDF