Patay na dihang nangalandig sa tambalanan ang usa ka negusyante ug iyang drayber nga gipamusil sa usa ka tawo samtang sila naglakaw, alas 6 sa gabii sa Miyerkules, Agusto 14, 2024, sa Barangay Mantuyop, lungsod sa Siaton, Negros Oriental.
Ang mga biktima giila sa mga alyas nga 'Juanillo', 45, minyo, kumprador og baboy, taga Barangay 2, Siaton, ug ang iyang drayber nga si Encilay, 39, ulitawo, taga Mantuyop.
Samtang ang suspek giila sa alyas nga 'Gajunera', 40, minyo, ug taga Poblacion 1 sa samang lungsod.
Sa imbestigasyon sa kapulisan sa Siaton, nasuta nga ang mga biktima nagkuyog nga naglakaw sa maong dapit.
Sa way igo nga hinungdan, silang duha gipamusil sa suspek gamit ang .45 kalibre nga pistola.
Ang mga biktima gidali sa pagdala sa mga rescue personnel sa Siaton District Hospital apan gideklarar nga patay na sa attending physician.
Samtang ang suspek nitahan sa kapulisan sa Siaton.
Atol ning pagsuwat, wa pa masayri ang motibo sa pagpatay samtang nagpadayon pa ang imbestigasyon./ DVG