Gilagdaan na ni Presidente Ferdinand ‘Bongbong’ Marcos Jr., ang balaod nga nagtinguha sa pagmugna og online application portal alang sa passport application.
Gipirmahan ni Marcos ang balaod niadtong Marso 11, 2024, ang “New Philippine Passport Act” nga nagbasura sa Republic Act No. 8239, o ang “Philippine Passport Act of 1996.”
Ang bag-ong balaod nagmando sa Department of Foreign Affairs (DFA) sa pagtukod ug pagmintinar sa online application portal ug Electronic One-Stop Shop nga daling ma-access sa opisyal nga website niini.
Gitugotan usab niini ang DFA nga mohatag og offsite ug mobile passport services sa mga lugar gawas sa consular offices ug foreign service posts (FSPs), maghan-ay og mga akomodasyon alang sa mga aplikasyon sa regular nga pasaporte sa senior citizens, persons with disabilities (PWDs), buntis, menor de edad nag-edad og pito ka tuig paubos, solo nga mga ginikanan, overseas Filipino workers (OFW), ug mga indibiduwal nga adunay emerhensya ug ubang kaso.
Ang balaod nag-ingon usab nga ang bisan kinsa nga tawo o entidad nga walay legal nga awtoridad nga mosakmit, maghupot, o magpugong sa bisan unsang pasaporte nga giisyu sa DFA, mag-antos sa silot nga pagkabilanggo nga dili moubos sa 12 ka tuig ug magbayad og multa nga dili moubos sa P1 milyon, apan dili molapas sa P2 milyunes.
Pagkapriso og unom ngadto sa 15 ka tuig ug multa nga dili moubos sa P100,000 apan dili molapas sa P250,000, ang ipahamtang batok niadtong mamatud-an nga sad-an sa paghimo og mini nga pasaporte ug uban pang kalapasan nga may kalabotan sa dili hustong paggamit sa pasaporte ug uban pang mga dokumento sa pagbiyahe.
Sa mga kalapasan nga may kalabotan sa pag-isyu og pasaporte, ang mga makalapas mag-atubang og minimum nga unom ka tuig nga pagkabilanggo hangtod sa labing taas nga 12 ka tuig nga pagkabilanggo ug multa nga dili moubos sa P100,000 apan dili molapas sa P250,000.
Ang balaod naglatid usab sa mga silot alang sa dili patas ug diskriminasyon nga mga buhat sa pag-isyu sa pasaporte, gikan sa pagkasuspinde ug pagkatangtang sa serbisyo, ingon man multa nga hangtod sa P250,000 ug labing taas unom ka tuig nga pagkapriso.
Ang mga regular nga pasaporte gihatag sa mga lungsuranon nga Pilipino nga dili kwalipikado o adunay katungod sa mga diplomatiko o opisyal nga pasaporte, lakip ang mga opisyal sa gobyerno o empleyado nga moadto sa gawas sa nasod alang sa kalingawan o uban pang personal nga mga hinungdan.
Ang mga opisyal sa gobyerno ug mga empleyado ug mga miyembro sa ilang mga pamilya mahimong, sa panahon sa ilang paglingkod sa katungdanan, maghupot og duha ka pasaporte nga dungan.
Ang bag-ong pasaporte nga balaod moepekto 15 ka adlaw human sa pagkompleto sa publikasyon niini sa Opisyal nga Gazette o sa usa ka mantalaan sa kinatibuk-ang sirkulasyon. / TPM