Padayon nga nanawagan si Cebu Governor Gwendolyn Garcia ngadto sa National Food Authority (NFA) nga mahatagan na sa supply nga bugas ang isla sa Sugbo ilabi na nga daghan nang mga programa ang nadelatar gumikan kay walay igong supply sa bugas.
“...kon ang Province of Cebu ang mopalit bayran namo, dili utangon. Paliton namo og P25. Magpaalkansi mig P5 alang sa atong Sugbo Mercadong Barato aron ang mga kabos makapalit og tag P20 per kilo kay dili mi rice traders,” matod ni Garcia pinaagi sa social media platform.
Kini maoy gipanawagan ni Garcia ngadto sa buhatan sa NFA aron mahatagan og igong supply sa bugas ang Probinsya sa Sugbo sanglit daghan sa mga kabos ang nag-atang aron makapalit og baratong bugas.
Gawas sa baratong bugas, gamiton usab kini alang sa feeding program sa Kapitolyo sa kabataan sa mga tunghaan sa tibuok lalawigan.
Ingon man ang bugasan sa kababayen-an nga naghatag og dugang pangita kanila. Sa maong programa hatagan sa kagamhanan og tag napulo ka sakong bugas aron ibaligya sa mga kabos sa ilang barangay.
Ang Kapitolyo nibaligya og bugas gikan sa NFA sa miaging tuig apan naundang tungod sa kakuwang sa supply gikan sa mao nga ahensya.
Samtang sa usa ka pamahayag niadtong Lunes, Marso 4, 2024, si Department of Agriculture Secretary Francisco Tiu Laurel Jr. niingon nga ilang ipatuman ang kamanduan sa Ombudsman sa pagsuspenso sa kapin 100 ka mga opisyal sa NFA tungod sa giingong kalambigitan nila sa kontrobersyal nga pagbaligya sa rice buffer stocks.
Nalakip sa gisuspenso si NFA administrator Roderico Bioco, assistant administrator for operations John Robert Hermano, ug pipila ka regional managers ug warehouse supervisors gikan sa tibuok nasod alang sa himuon nga imbestigasyon labot sa hitabo.
Wa hinuon matino kon duna bay opisyal dinhi sa rehiyon 7 nga naapil sa pagsuspenso. Nasuta nga ang mga sinakong bugas gibaligya ngadto sa duha lang ka negusyante. / ANV