Ex-convict nga nabutang sa listahan isip high value individual ang nasikop sa mga sakop sa Sawang Calero Police Station atol sa gilusad nga buy-bust alas 9:50 sa gabii, Lunes, Marso 24, 2025 sa Belgium street, Barangay Suba, Dakbayan sa Sugbo human makuhaan og binulto sa gituohang shabu ug armas.
Ang suspek giila nga si Raymund Gocotano Rosal alyas Munda, 43, taga Sityo Bayanihan, Barangay Lahug.
Nasakmit sa mga sakop sa Station Drug Enforcement Unit sa station 6 sa Cebu City Police Office (CCPO) ang mga dagkong putos sa gituohang shabu nga motimbang sa 417.3 gramos nga mobalor og P2,837,640.
Lakip sa nakuha ang usa ka 38 nga revolver nga dunay duha ka mga bala nga giluklok sa iyang hawak.
Matod sa usa sa mga operatiba sa kapulisan nga usa ka semana nila nga gipaubos sa monitoring ang maong suspek human nigawas ang iyang pangalan nga nalambigit sa ilegal nga drugas.
Makabaligya kini og tunga sa kilo matag semana diin siya ang sinaligan nga bodegero sa iyang supplier ug siya usab ang gitawag nga kabayo kon tighatod sa kontrabando sa iyang kustomer.
Ang iyang distribution mao ang tibuok Suba ug mga kasikbit nga barangay lakip na sa Dakbayan sa Mandaue ug Talisay.
Si Police Lieutenant Colonel Maria Theresa Macatangay, deputy city director for operation sa CCPO nibutyag nga si Rosal nadakpan na kaniadto sa kaso gihapon sa ilegal nga drugas.
Bisan nasulod siya sa bilangguan ug sa iyang paglaya wala siya moundang ug nagpadayon gihapon sa pagpaligya sa ilegal nga drugas.
Gidugang ni Macatangay nga nagpadayon karon ang gihimong imbestigasyon ug intelligence gathering aron pag-ila kinsa ang iyang supplier.
Kalapasan sa Section 5 ug 11, Article II, RA 9165 ug RA 10591 in relation sa Comelec gun ban ang atubangon nga kaso sa suspek. / AYB