Padayon ang TNT Tropang 5G sa pagpanikaysikay aron padak-an ang ilang purohan kabahin sa ilang intensyon nga malabni ang Grandslam title sa kasamtangang 49th season sa Philippine Basketball Association (PBA).
Sa labing ulahi nilang lakang, gipunit sa Tropang 5G si shooting guard Mike Nieto gikan sa listahan sa unrestricted free agent sa Converge FiberXers.
Sa sayo pa, apil unta si Nieto sa inisyal nga kasabutan nga nagpabalhin ni Jordan Heading gikan sa FiberXers ngadto sa Tropang 5G baylo ni Mikey Williams apan wala kini nadayon.
Nagkasinabot hinuon ang Tropang 5G ug FiberXers sa one-on-one trade nga naglambigit nila ni Heading ug Williams.
Human niini, nakadesisyon ang FiberXers nga ibutang si Nieto sa ilang sa unrestricted free agent ug mao kini ang naghatag og kahigayunan sa Tropang 5G aron makuha si Nieto.
“Yes he’s part of the deal. But since he’s (Nieto) UFA (Unrestricted Free Agent), it just turned out he was just picked up from Converge,” pasabot ni TNT team manager Jojo Lastimosa.
Gipasabot ni Lastimosa ang kapabilidad ni Nieto maoy usa sa ilang gikinahanglan sa pagpadayon sa ilang kampanya sa Philippine Cup. / ESL