Ang Camotes Group of Islands kanhi nabiyaan sa kalambuan. Apan ning nakalabay nga duha ka mga dekada, paspas ang paglambo tungod sa mga imprastraktura, labina sa pagkongkreto sa iyang mga karsada ug pagpalambo sa ilang mga pantalan.
Ang maorag danawan nga mga karsada kaniadto, sagad kongkreto na karon. Pipila ka mga tuig ang nakalabay, kasagaran sa biyahe gikan sa mainland pinaagi lang sa Dakbayan sa Danao. Nahunong man gud ang mga biyahe sa fastcrafts nga manukad sa mga Dakbayan sa Sugbo ug Lapu-Lapu.
Wa kini masustenihi. Sa miaging tuig, gibuksan ang laing pantalan sa lungsod sa Liloan. Modunggo ang barko sa lungsod sa Poro gikan sa mainland Cebu. Ang barko nga manukad gikan sa Danao City sa San Francisco modunggo.
Makapili ka na sab sa imong i-hire nga transportasyon, depende sa imong panginahanglan. Unsa may makita sa Camotes? Gawas sa iyang maanindot nga mga baybayon ug cave formations, sagad konektado sa dagat, ang isla duna say nightlife.
Yes, kon gusto ka og kalingawan. Ang inila kaayo nga mas accessible sa publiko mao ang Baywalk sa lungsod sa San Francisco kay pampubliko kini. Nagsilbe na kini nga plaza nga ikapasigarbo kaayo sa lungsod kay di sab mabintahaan ang iyang kaanindot.
Magsugod na og tapok sa dapit ang mga tawo sa dayong sawop sa adlaw. Gawas nga naa ra ang merkado sa duol, diin mamahimo kang mokaon sa mga karenderya, mamalit og maluto nga isda ug karne sa baboy ug manok ingon man mga utanon, duna kini lapad nga parking area sa mga sakyanan, konkreto nga mga bench daplin sa baybayon.
Maanindot sab ang iyang mga suga nga dagitab kay maiwagan ang kabakhawan sa baybayon. Naglinya usab ang lainlaing mga pagkaunan ug café nga mosilbe og mga ilimnon, kape, milk tea, pizza, French fries ug uban pang lamian nga mga pagkaon.
Sa ilang municipal promenade, dunay libreng salida sa sine matag gabii. Dunay dako nga screen nga dunay maanindot nga sound system nga gimontar alang sa publiko. Ang sama nga big screen mao sab ang gamiton niadtong mahilig og Zumba kada hapon.
Tinuod mingaw ang kadaghanan sa mga dapit sa mga isla sa Camotes, apan di sum-ol o puol ang imong nightlife kay duna kay masuroyan panahon sa kagabhion sa tibuok semana.