Pulos naa sa talandugon ang kahimtang sa sulod sa tambalanan ang driver sa motorsiklo ug ang iyang nabangga-an alas 11:35 sa gabii, Sabado, Hulyo 5, 2025 sa Gorordo Avenue, Barangay Kamputhaw sa dakbayan sa Sugbo.
Ang driver sa motorsiklo giila nga si Earl Sean Abellar Estrella, 20, taga Barangay Kalunasan sa dakbayan sa Sugbo.
Sa imbestigasyon sa Traffic Enforcement Unit (TEU) sa Cebu City Police Office, nasayran nga kusog ang dagan ni Estrella og sa dihang mi-overtake kini sa laing sakyanan wala niya mabantayi ang usa ka babaye nga milabang sa karsada nga maoy hinungdan nga iya ning nadasmagan.
Tungod sa kakusog sa impact, nalagpot ang biktima nga si Jane Sy, taga Barangay Kamputhaw, ug nalamba sa sementado nga karsada ug napantok ang ulo niini.
Ang mga nakasaksi sa insidente mao nay nanawag sa mga medical personnel nga maoy midala sa duha sa Perpetual Succour Hospital.
Giandam na sa TEU ang kasong Reckless Imprudence Resulting Serious Physical Injury batok sa driver. / AYB