Mga duwa karon:
5:15 pm- NLEX batok Terrafirma
7:30 pm- Magnolia batok Meralco
Padayong protektahan sa NLEX Road Warriors ang ilang limpyong rekord sa ilang pagpakigbatok sa Terrafirma Dyip sa premirong duwa karong Biyernes, Agusto 7, 2026, sa Philippine Basketball Association (PBA) Season 50 Governors’ Cup sa Ninoy Aquino Stadium.
Ubos sa paggiya sa bag-o nilang coach nga si Jimmy Alapag, ang Road Warriors wala pa sukad nakatilaw og pilde sulod sa unom ka mga duwa, nga nagtuboy kanila sa liderato sa Group A.
Gipasabot ni Alapag nga padayon niyang gipahimangnuan ang iyang mga batos nga magtutok sa ilang matag duwa ug dili hatagan og dakong pagtagad ang ilang kasamtangang naabot tungod kay posible kining makatakilpo sa maayong dagan sa ilang kampanya.
“I want us to try our best to not think about the record so much, just because there’s still so much conference left to play,” pasabot ni Alapag, nga napatik sa www.pba.ph.
Dili ikalimod nga dakong inilog ang Road Warriors batok sa Dyip, nga kasamtangang adunay 2-4 nga rekord.
Apan angayang hunahunaon sa Road Warriors nga grabeng pagpanghulga ang ilang naagian una nila nabangga sa kapildihan ang Dyip, 101-100, sa premiro nilang duwa niadtong Hulyo 12.
Sa main game, magsangka ang Magnolia Chicken Timplados Hotshots ug Meralco Bolts sa krusyal nga engkuwentro sa Group B.
Ang Hotshots adunay 2-3 nga rekord samtang ang Bolts adunay 2-4 nga rekord ug pulos sila nagkinahanglan og dugang kadaugan aron paamagon ang ilang poruhan sa crossover quarter-finals.
Sa mga duwa niadtong Miyerkules, gipanghubog sa San Miguel Beermen ang Converge FiberXers, 126-114, samtang gipayukbo sa Blackwater Bossing ang Phoenix Super LPG Fuel Masters, 106-100. / ESL