Gipahimangnoan sa National Nutrition Council (NNC)-7 ang mga inahan nga pasusuhon ang ilang mga bata alang sa labing maayo nga resistensya bisan pa sa nagpadayong isyu sa breastmilk insecurity sa nagtrabaho nga mga inahan.
Sa usa ka interbyu sa SunStar niadtong Huwebes, Hulyo 3, 2025, si Dr. Parolita A. Mission, RN, Regional Nutrition Program Coordinator sa NNC-7, nitataw nga ang gatas sa inahan naghatag og mas taas nga resistensya kumpara sa mga bata nga gipasuso og formula sa gatas.
“It will provide immunization sa imo bata and prevent the child from acquiring diseases,” matod niya.
Gipasabot ni Mission nga kumpara sa gatas sa inahan, ang infant formula walay sulod nga colostrum, usa ka sangkap nga makuha lang pinaagi sa pagpasuso sa mga bata.
Si Sheila Gelig, sa usa ka text interview sa SunStar, nipaambit nga niundang na siya sa pag-breastfeed sa iyang siyam ka bulan nga bata kay maglisod na siya sa pagpagawas og gatas tungod sa iyang trabaho isip virtual assistant.
Gitumbok ni Gelig nga ang pagtrabaho gikan sa alas 7:00 sa buntag hangtod alas 4:00 sa hapon nakapakunhod sa supply sa iyang gatas hinungdan nga napugos siyang mogamit na lang og infant formula.
Si Jane, dili tinuod niyang ngalan, nihunong usab sa pagpasuso sa iyang anak tungod sa ubos nga supply sa breast milk human sa gibanabanang usa ka tuig nga pagpasuso.
“The biggest challenge for me while at work is to find the time to collect or pump milk during my duty period, especially working in a clinic,” matod ni Jane, kinsa usa ka nurse.
Apan gipasabot ni Mission nga mogawas ra pg balik ang gatas sa inahan kon ipasupsop lang kini sa bata.
“Naa tay mga testimonial nga bisan ni-stop og breastfeeding, puwede ra na niya balikon bisan pa’g one month naputol iyahang breastfeeding. Mobalik ra gyud basta iyaha lang ipa-suck sa baby,” pasabot ni Mission./ Ruyz Angela Lois Manacap, CNU Intern