Suwayan pagselyo sa Magnolia Hotshots ang No. 1 spot sa ilang pagpakigbatok sa Meralco Bolts sa out-of-town game sa Philippine Basketball Association (PBA) Season 48 Commissioner’s Cup karong alas 6:30 sa gabii, Enero 6, 2024, sa University of San Agustin Gym sa Iloilo City.
Ang Hotshots, nga mosagubang sa katapusan nilang tahas sa elimination round, kasamtangang nag-una sa standing dala ang 9-1 nga rekord apan puwede pang modakin-as sa ilang mga kamot ang No.1 nga luna kon mapilde sila ning sangkaa.
Taudtaod na man tuod nga nakaseguro ang Hotshots og luna sa Top 4, nga nagtangag og twice-to-beat nga insentibo sa quarter-finals, apan determinado silang magpadayon ang momentum sa ilang kampanya.
Sa ilang bahin, ang Bolts kasamtangang naa sa ikatulong luna dala ang 6-2 nga rekord.
Nagtinguha ang Bolts nga mas pahayagon pa ang ilang paglaum nga makasulod sa Top 4.
Ning sangkaa, ang Bolts moparada og bag-ong import nga si Shonn Miller.
Nakadesisyon ang Bolts nga mokuha og bag-ong import gumikan kay adunay isyo sa kahimsog ang ilang orighinal nga import nga si Zach Lofton.