Ang Cebu City Transportation Office (CCTO), ubos sa City Ordinance (CO) 2239, gikatakdang mohimo og laing mga lakang aron mapalambo ang pagdumala sa trapiko sa Governor Cuenco Ave. o ang nailang (Banilad-Talamban) BanTal corridor.
Aron maseguro ang dagan sa trapiko nga dili makompromiso ang accessibility, ang Road Management Authority (RMA) o ang CCTO, nagplano nga ipatuman ang ‘assisted/regulated left turns’ sa mga agianan sa commercial ug residential properties, gipahibalo sa CCTO head niadtong Dominggo, Enero 7, 2024.
Sugdan sa alas 5:00 sa buntag sa adlaw’ng Lunes, Enero 8, 2024, tangtangon na ang ‘no left turn’ signages sa Gov. Cuenco Ave., gikan sa ‘Tesda flyover’ hangtod sa ‘Foodland flyover’ sa Banilad.
Bisan pa, ang pagtangtang adunay kondisyon sa pagbutang sa 24-oras nga traffic marshals nga gitugyanan sa CCTO, sa matag pribadong agianan.
Ang marshals motabang ug mo-regulate sa mga sakyanan nga moliko sa wala, paingon o gikan sa Gov. Cuenco Ave.
Ang matag driveway kinahanglang adunay labing minos usa ka traffic marshal nga nakapuwesto sa sentrong linya sa Gov. Cuenco Avenue, ilabina atubangan sa tagsa-tagsa ka entry o exit points.
Si Raquel Arce, pangu sa CCTO niingon nga usa ka comprehensive assessment ug monitoring period nga 15 ka adlaw, sugod sa Enero 8, 2024, ang ipahigayon aron sa pagtimbang-timbang sa pagka-epektibo sa maong traffic scheme.
Matod ni Arce, ang mga nakaplagan maoy mogiya sa buhatan sa transportasyon sa paghimo og mas episyente nga plano sa pagdumala sa trapiko nga gipahaum sa panginahanglan sa koridor sa Banilad.
Sa miaging Pasko, gipatuman ang ‘one-way flyover scheme’ sa tulo ka flyovers sa maong dapit sulod sa duha ka adlaw.
Apan, kini niani og mga negatibong komentaryo sa mga motorista ug mga pedestrian nga matod pa, nakapasamot sa problema sa trapiko sa dapit.