Ang Cebu City Council nihangyo sa Cebu City Transportation Office (CCTO) nga dili na tugotan ang pag-parking sa mga sakyanan ang sidewalk sa Osmeña Boulevard ug uban nga main thoroughfares sa dakbayan.
Sumala sa resolusyon nga giuyyonan atol sa regular session sa konseho niadtong Miyerkules, Abril 23, 2025, ang Osmeña Boulevard adunay mga sidewalk nga gipalapdan ug giayo aron hamugaway nga maglakaw ang mga tawo.
Hinuon, wala na hisguti ang mga ngan sa dagkong dalan sa resolusyon.
Dugang sa resolusyon nga gibutangan usab og tactile pavement ang sidewalk aron matabangan ang mga tawo nga adunay deperensya sa panan-aw.
Apan adunay higayon nga ang sidewalk gihimo’ng parking area sa uban’g mga motorista.
Niadtong Pebrero, usa ka hulagway nga gi-post sa usa ka netizen ang nag-viral online nga nagpakita sa usa ka sedan nga sakyanan nga nag-park sa sidewalk atubangan sa usa ka bangko, nga nakababag sa halos katunga sa gilapdon sa sidewalk.
Gipasabot sa resolusyom nga tungod sa pag-park sa mga sakyanan sa mga sidewalk, makabalda kini sa paglakaw sa mga tawo ug makaguba sa mga tactile pavement.
Niadtong Mayo 2023, giaprobahan sa konseho ang ordinansa nga magsilot sa mga makababag sa mga sidewalk, eskinita ug mga agianan sa mga pampublikong luna.
Ang silot sa makalapas mao ang written notice sa unang kalapasan, multa nga P3,000 ug/o pagka-priso nga dili molapas sa 30 ka adlaw sa ikaduhang kalapasan, ug P5,000 o pagkapriso nga dili molapas sa usa ka tuig depende sa desisyon sa korte ug pagbakwi sa business permit kon business operator ang makalapas. / JPS