Human sa lain na usab nga disgrasya sa transcentral highway (TCH) sa Dominggo, Oktubre 13, 2024 diin nakalas ang usa ka rider nga napasok sa usa ka sports utility vehicle (SUV), nagtagbo ang traffic board sa kagamhanan sa Dakbayan sa Sugbo aron hisgotan unsaon pagsulbad ang padayon nga problema sa aksidente sa maong dapit.
Matod ni P/Lt. Col. Wilbert Parilla, regional chief sa Highway Patrol Unit (HPU) 7, nga iyang gisugyot ngadto sa Traffic Board pinaagi ni Konsehal Rey Gealon nga mag-umol kini'g ordinansa pagbutang og 'no parking' ug 'no stopping' sa Red Cliff aron dili na kini pundohan sa mga motorista ug mga mamitikay sa maong lugar.
Kini ang hinungdan nganong dunay daghang madisgrasya tungod aning pag garagara sa mga motorista panahon sa Sabado hangtod sa Dominggo.
Kung duna na unyay ordinansa, mamahimo na nga manakop ang mga sakop sa Cebu City Transportation Office lakip na ang Highway Patrol Unit 7.
Gawas niini, nakig-alayon na usab ang ilang buhatan sa Department of Public Works and Highways aron pabutangan nila og rumble strips kun white solid line sa karsada nga dili na maka-motor banking ang mga riders diin mao kini kasagaran ang makasugat og disgrasya.
Dunay mikatap nga video sa Red Cliff nga 'nag-banking-banking' nga rider apan na-overshoot kini ug na disgrasya na hinuon.
"Para dili nana sila maka banking-banking diha kay kung dili nato na butangan siya usually kusog gyud kaayo mopadagan labi nag naay mag picture so mag banking-banking dayon," dugang ni Parilla sa Superbalita Cebu.
Nabantayan ni Parilla nga dunay mga motorista nga mag-estambay sa TCH nga nag-inom og ilimnon nga makahubog nga usa sa hinungdan nga mangadisgrasya na sa panahon nga magmaneho sa ilang sakyanan nga hubog o nakainom na.
Nakadawat usab og reklamo ang buhatan sa kapulisan sa Dakbayan sa Sugbo gikan sa mga residente sa bukid nga naproblema na sila sa ilang pagpahuway sa gabii tungod kay gihimong lumbaanan ang TCH diin kusog kaayo ang tingog sa ilang mga tambutso sa motorsiklo.
Tungod niini, dunay pipila ka mga molupyo sa lugar ang mibato sa mga riders nga moagi diin ang ilang motor saba kaayo ang andar.
Mibahad si Parilla nga ilang panakpon kining maong mga motorsiklo tungod kay dunay balaod nga gidili ang pagtaud og saba nga muffler. / AYB