Mga duwa karon:
5:00 pm- NorthPort batok Terrafirma
7:30 pm- Rain or Shine batok NLEX
Masubhan ang Rain or Shine Elasto Painters ug NorthPort Batang Pier karong Sabado, Abril 12, 2025, batok sa lainlaing kontra sa Philippine Basketball Association (PBA) Season 49 Philippine Cup sa Ninoy Aquino Stadium.
Ang Batang Pier makigbatok sa Terrafirma Dyip sa premirong duwa samtang ang Elasto Painters makigsangka sa NLEX Road Warriors sa main game.
Mao kini ang labing unang duwa sa Elasto Painters ug Batang Pier human sa ilang kampanya sa niaging Commissioner’s Cup diin pareho silang nakasulod sa semi-finals kauban ang Barangay Ginebra Gin Kings ug ang nahimong kampyon nga TNT Tropang 5G.
Ang Elasto Painters naglaum nga makasugat sila og hugot nga kombati batok sa Road Warriors nga nagtinguhang makabangon gikan sa ilang pagkapilde batok sa San Miguel Beermen, 89-98, sa premiro nilang tahas sa komperensya.
Naghinamhinam ang Elasto Painters kon unsa ang ilang ikabuga ning All-Filipino Conference human sa maayo nilang kampanya sa Governor’s Cup ug Commissioner’s Cup.
Sa pagpadayon sa ilang kampanya, malaumon ang Elasto Painters nga mas nahinog na kapabilidad sa ilang batan-ong puwersa nga pangulohan nila ni Adrian Nocum, Andrei Caracut, Jhonard Clarito, Leonard Santillan, ug Caelan Tiongson.
Sama sa naandan, ang Road Warriors magsalig og maayo sa ilang lider nga si Robert Bolick.
Sama sa Elasto Painters, ang Batang Pier naghinamhinam sab nga masukod ang kalambuan sa ilang puwersa ning komperensya nga wala’y import.
Sa ilang bahin, ang Dyip nasubhan og daog batok sa Phoenix Super LPG Fuel Masters, 95-87, apan nasugamak sa dakong pilde batok sa defending champions Meralco Bolts, 80-118, sa ikaduha nilang tahas. / ESL