Giingong sakop sa New Peoples Army (NPA) nadakpan sa kapulisan alas 2 sa kaadlawon sa Sabado Abril, 6, 2024 sa Sitio Tuwang, Brgy. Poblacion, lungsod sa Pamplona, Negros Oriental.
Si Perlito Rebanuel Emperado, 26, alias Jingjing, laborer, dunay kapuyo, nasikop sa CIDG Negros Oriental Provincial Field Unit (PFU) uban sa 63rd Special Action Company, Regional Intelligence Unit (RIU 7-NORPIT) ug Pamplona Police Station.
Si Police Major Nazarino Emia, hepe sa CIDG-Negros Oriental (PFU) nga nahinabi sa Superbalita Cebu, niingon nga kabahin sa ilang Oplan Pagtugis ang pagkasikop sa suspek.
Sumala pa ni Emia nga ang akusado giingong most-wanted person (MWP), Regional Level No. 4, ug no. 1 sa municipal level (MWP) sa Sta. Catalina Municipal Police Station.
Ang suspek dunay duha ka mga kaso’ng murder nga ang warrant giisyu ni Judge Maria Myla Rae Santos Orden sa Branch 63 sa Regional Trial Court (RTC 7) sa Bayawan City, Negros Oriental, gipetsahan og Pebrero 27, 2023. Way piyansa nga gitugot. / GPL