Nakapuntos si Jamal Murray pinaagi sa 15-foot step-back jumper dungan sa final buzzer aron agakon ang hosts Denver Nuggets sa kadaugan batok sa Los Angeles Lakers, 101-99, sa Game 2 sa ilang Western Conference 1st round playoffs series sa National Basketball Association (NBA) ning Martes, Abril 23, 2024 (PH time).
Sa kadaugan, ang defending champions Nuggets nakarehistro og 2-0 nga bintaha sa best-of-seven series.
Sa sayong bahin sa kombati, nakalabaw ang Nuggets og 5-3 apan human niini, kanunay na silang naggukod ug ang nakapadaug nga puntos ni Murray mao pa lang ang higayon nga nailog nila pagbalik ang labaw.
Ang nakapadaug nga puntos ni Murray nahimong posible human nasipyat ang usa sa mga lider sa Lakers nga si LeBron James sa iyang three-point attempt sa nahabiling 16 ka mga segundos diin niadtong gutloa, nagtabla ang duwa, 99-99.
Human sa sipyat ni James, nalangkat ni Michael Porter Jr. ang rebound ug gipasa niya ang bola, kinsa wala magmakuli pag-itsa sa nakadaig nga puntos atubangan sa depensa ni Anthony Davis.
Ang Nuggets gipangulohan ni Nikola Jokic pinaagi sa iyang 27 puntos ug 20 ka rebounds, niamot og 22 puntos si Porter samtang nitampo og 20 puntos si Murray.
Ang Lakers gipangulohan ni Davis pinaagi sa iyang 32 puntos, nihatag og 26 puntos si James samtang nitunol og 23 puntos si D‘Angelo Russell.
Sa Eastern Conference, nakaposte sab og 2-0 nga bintaha ang hosts teams New York Knicks ug Cleveland Cavaliers human nila gipang-usban pagbuntog ang tagsa-tagsa nila ka kontra sa Game 2 sa kaugalingon nilang 1st round series.
Gipatapsingan sa Knicks ang Philadelphia 76ers, 104-101, samtang gipangmakmak sa Cavaliers ang Orlando Magic, 96-86. / AP