Gisiguro sa Denver Nuggets nga di makalabok ang Los Angeles Clippers ug miposte na kini og dako nga labaw sa sayong bahin pa lang sa Game 7 sa National Basketball Association (NBA) first-round playoff series didto sa Denver, kagahapon, Mayo 4 (PH time).
Misutoy ang Nuggets ngadto sa 120-101 nga dominante nga kadaogan para isarado ang series, 4-3, ug moabanti sa Western Conference semifinals diin ilang ikatigi ang top-seeded Oklahoma City Thunder.
“It feels good,” sigon ni Nuggets coach David Adelman, “but I also know we're flying to O-K-C tomorrow.”
Ang bigman nga si Nikola Jokic mipakatap og 16 puntos, 10 rebounds ug walo ka assists sa 33 minutos nga playing time.
Nakadawat si Jokic og igo nga tabang gikan sa iyang teammates.
Si Aaron Gordon miduso og 22 puntos, si Christian Braun miamot og 21 puntos, si Jamal Murray ug Russell Westbrook mitunol og 16 puntos matag-usa, samtang si Michael Porter miamot og 15 puntos.
Gidayeg ni Jokic ang iyang teammates sa gipakita niini sa importante kayo nga duwa sa playoffs, ang Game 7.
“In playoffs, we know that everybody needs to step up, offensively, defensively, whatever, energy-wise. And everybody who plays needs to contribute something," sigon ni Jokic. “It was special today the guys did that.”
Si Braun di lang puntos ang gibuhat ug gilimitahan pud niini ang opensa ni Clippers star James Harden, kinsa igo lang nakahimo og 7 puntos sa 2-of-8 shooting.
“Everybody behind me allowed me to guard him. But I think maybe the biggest part was Russ,” matod ni Braun. "He's played against James, he's played with James, so he knows his game. ... The coaches trusted me tonight. We didn't want to switch. They kept me on him all night. So, credit goes to those guys and the coaches.”
Ang Clippers gipangulohan ni Kawhi Leonard sa iyang 22 puntos, samtang si Ivica Zubac igo lang nakamaniubra og 10 puntos.
“I don't think this team was 30 points better than us,” sumala ni Leonard. “We saw that throughout the first six games of this series, but you've got to give them credit. They came out, ran hard in transition, got easy points and they made shots.”
Sugdan ang Nuggets-Thunder series karong Martes (PH time).
Ang Thunder nakapahuway og semana tungod gi-sweep man nila ang Memphis Grizzlies sa first round. / RSC