Niubos na gikan sa 600,000 ngadto sa dul-an sa 300,000 ang gidaghanon sa wala ma-claim nga mga plaka sa sakyanan sa Central Visayas.
Mao kini ang gibutyag sa Land Transportation Office (LTO) Cebu City District Office sa SunStar Cebu niadtong Martes, Abril 23, 2024.
Si LTO Cebu City District Office Chief Joel Maloloy-on niingon nga kini nga gidaghanon usa na ka kalampusan.
Ang isyo sa wala pa mapagawas nga mga plaka gipahibalo sa publiko niadtong Agusto sa miaging tuig.
Wala hinuon mohatag og insaktong numero si Maloloy-on sa gidaghanon sa gipang-apud-apod nga mga plaka o sa nahabiling wa ma-claim nga mga plaka, apan matod niya nga 4,000 ngadto sa 5,000 ka mga plaka ang ilang giapod-apod matag adlaw.
Matod niya nga target nila nga maapud-apod ang 300,000 ka mga plaka nga nahabilin sa katapusan sa tuig.
Ang LTO 7 una nga nagplano nga hingpit nga ipang-apod-apod ang kapin sa 600,000 nga wala ma-claim nga mga plaka sa Oktubre 2023.
Dugang ni Maloloy-on nga plano nila nga paspasan ang proseso sanglit ilang gipaabot nga 30 pa ka personnel ang motabang sa pagpanghatag.
Sa dihang nibisita si LTO Chief Assistant Secretary Vigor Mendoza II sa pasilidad sa LTO 7 sa Talisay City niadtong Agusto 2023, ang kalihim ug lokal nga mga tigbalita gipahibalo nga dul-an sa 670,000 ka mga plaka nga gitipigan sa pasilidad wala ma-claim.
Sa ihap, 530,000 ang para sa mga motorsiklo, samtang 140,000 ang para sa mga motorized four-wheeled vehicle. Pipila sa mga license plate giisyu kaniadtong 2018.
Si LTO 7 Director Glen Galario, sa sayo pa, niingon nga lakip sa ilang hagit sa pag-apud-apod sa mga plaka mao ang intermittent connectivity issues sa ilang pasilidad sa Talisay City, kakuwang sa public awareness ug kakuwang sa personnel ug equipment.
Matod ni Galario niadtong Agusto 2023, ang ilang pasilidad adunay usa lang ka set sa scanner ug computer, nga makahimo sa pag-scan sa gibana-bana nga 30 ngadto sa 50 ka plaka kada adlaw. Kini nga limitasyon miresulta sa pag-release lang sa 20 ngadto sa 30 ka plaka kada adlaw, matod niya.
Ang LTO central office niadtong Septiyembre 2023 nipakatap og tulo ka mga personnel nga nagdala usab og duha ka kompyuter aron paspas ang pag-scan sa QR codes ug pag-imprenta sa RFID stickers alang sa mga plaka.
WAY BACKLOGS
Sa laing bahin, si Maloloy-on niingon nga sa pagkakaron walay atraso gikan sa bag-o nga pagpalit sa bag-ong mga sakyanan, tungod kay ilang gipatuman ang 11 ka adlaw nga bintana alang sa pagparehistro sa sakyanan ug pag-apod-apod sa plaka.
Matod niya, ang LTO Cebu City District Office, uban ang regional counterpart niini, hugot nga mag-monitor sa mga car dealership aron maseguro nga matuman ang gitakda nga time frame sa pagparehistro alang sa mga bag-ong sakyanan.
Base sa ilang guidelines, ang dealer mokompleto sa pagproseso sa may kalabutan nga mga dokumento alang sa dili-motorsiklo, kasagaran sulod sa pito ngadto sa 11 ka adlaw gikan sa petsa sa pagbaligya ngadto sa tag-iya sa sakyanan.
Ang dealers maoy nagdumala sa mga rekisitos, sales reporting ug inisyal nga rehistrasyon, dayon ang LTO ang magparehistro sa sakyanan ug moisyu sa opisyal nga resibo/certificate of registration (OR/CR) ug plaka sa dealer. Pahibaw-on dayon sa tigbaligya ang tag-iya nga kolektahon ang OR/CR, ug ang plaka sa higayon nga maisyo.
Alang sa mga motorsiklo, ang pagproseso sa dokumento kasagaran mokabat og tulo ngadto sa lima ka adlaw gikan sa petsa sa pagbaligya ngadto sa tag-iya sa motor.
Dugang pa, si Maloloy-on niingon nga ilang gitubag usab ang isyo sa dili rehistrado nga mga sakyanan sa rehiyon, nga nag-ingon nga ilang gi-tap ang tanang lokal nga mga opisyal sa lainlaing mga lugar aron adunay information campaign ug enforcement drive sa pagparehistro niini nga mga sakyanan.
WAY MAREHISTRO
Dugang pa ni Maloloy-on nga 40 porsyento o dul-an sa 400,000 sa gibana-bana nga usa ka milyon ka mga sakyanan sa Central Visayas nagpabiling wala marehistro.
Matod ni Maloloy-on nga ang kakuwang sa reinforcement sa mga operasyon kaniadto, ingon man ang mga naa sa halayo nga wala maabot sa ilang mga serbisyo, maoy usa sa mga hinungdan niini.
Siya niingon nga dili siya makahatag og lab-as nga datos sa gidaghanon sa wala marehistro nga mga sakyanan, apan siya miingon nga sila “nagdugang sa gidaghanon kutob sa pagrehistro ug paglisensya.”
Dugang pa niya nga ang ilang mga buhatan nag-atiman sa labing menos 350 ngadto sa 400 ka mga aplikasyon sa pagparehistro matag adlaw. / KJF