Usa ka brgy. konsehal nga registered nurse usab pasakaan og kasong paglapas sa Republic Act 9165 kun Comprehensive Dangerous Drugs Act 0f 2002 human siya nasikop sa buy-bust sa mga alas 6:30 sa gabii sa Marso 26, 2024, sa Brgy. Bitoon, lungsod sa Dumanjug, habagatang kasadpang Sugbo.
Ang suspek nga giilang High Value Individual nga drug pusher mao si Clyde Gail Denuyo Mancilita, 36, minyo, taga Brgy. Bitoon.
Ang Drug Enforcement Unit Intelligence Police sa Dumanjug nga gipangulohan sa ilang hepe nga si P/Capt. Jan Ace Elcid Pascua Layud nakakuha’g impormasyon nga ang suspek namaligya’g shabu.
Ila kining gi-validate ug sa dihang positibo, ilang gi-buy-bust pinaagi sa koordinasyon sa Philippine Drug Enforcement Agency (PDEA 7).
Nakuhaan og gituohang shabu ang suspek, kinsa gipriso na sa Dumanjug Police Station alang sa pagpasaka og kaso. / DVG