Nalatayan-patay ang 39 anyos nga babaye sa nagsunod nga tanker truck samtang ang biktima angkas sa motorsiklo niadtong alas 7:20 sa gabii, Miyerkules, Marso 19, 2025, sa habig sa viaduct sa South Road Property, Barangay Mambaling, Dakbayan sa Sugbo.
Ang biktima giila nga si Rubeliz Oyao, usa ka nurse aide sa pribadong tambalanan sa Dakbayan sa Sugbo ug residente sa Barangay Agus, Dakbayan sa Lapu-Lapu.
Sa imbestigasyon sa Traffic Enforcement Unit (TEU) sa Cebu City Police Office, angkas ang biktima sa motorsiklo nga gimaneho sa iyang kapuyo nga si Glenn Dela Rosa Ochea, 45, gikan sa Dakbayan sa Carcar ug pag-abot sa tungason nga bahin sa viaduct atubangan sa torre, kalit lang nga nasangit ang manobela sa motor kilid sa tanker nga gimaneho ni Damelito Loro Casas, 50, residente sa Barangay Bongayan, Lungsod sa Borbon, Probinsiya sa Sugbo.
Human nga nadagit ang motor, nahulog ang biktima ug nalatayan hinungdan sa iyang hinanali nga kamatayon.
Si Ochea kinsa naangol sab sa insedente nagkanayon nga gikan sila nitambong og kasal sa manghod sa biktima sa Carcar ug padulong na unta sila nga mopauli sa Dakbayan sa Lapu-Lapu agi sa CCLEX nga mao usab ang destinasyon sa tanker.
Iyang gidugang nga bisan nanambong sila sa kasal apan wala matod pa sila makainom niadtong tungora.
Pagbutyag ni Ochea nga hinay lang ang ilang dagan gani nipidpid sila sa karsada kay giingnan siya sa iyang kaipon nga nipadaplin sab ang tanker.
Kalit nga naigo ang manobela niini sa kilid sa tanker nga maoy hinungdan nga natumba sila gani nabatian pa niya ang dahunog sa ligid nga duol na lang sa iyang helmet.
Sa iyang pagbangon, iyang nakita ang iyang kaipon nga si Oyao nga wala na maglihok ug sa iyang pagsusi daw sa nabali na ang lawas ug liog niini.
“Okey ra man gyud akong dagan sir, ambot nganong naingon ato man to? Nganong gikuha man siya sa Ginuo nako uy?,” dugang ni Ochea.
Ang mga motorista na ang nipahibawo sa drayber sa tanker truck nga nakadisgrasya kini og tawo diin diha pa kini nihunong.
Kasamtangan nga gikustodiya sa TEU si Casas ug nibutyag nga wala siya makamatikod sa motor nga iyang nasundan ug nakurat na lang siya nga aduna nay mipaka sa iyang luyo nga bahin sa tanker truck nga iyang gimaneho.
Matod ni Police Executive Master Sergeant Felix Clint Almension ang Chief Investigator sa Traffic Enforcement Unit sa CCPO nga giandam nila ang kasong reckless imprudence resulting to homicide ug laing kasong Physical Injuries resulting to damage to property. / DVG / AYB