Opisyal nga gilusad sa Lapu-Lapu City Health Office ang ika-51 nga Nutrition Month sa Lapu-Lapu City Auditorium niadtong Hulyo 4, 2025.
Ang kalihukan nagtigom sa nagkalainlaing mga sektor, lakip na ang health workers, miyembro sa komunidad, ug lokal nga opisyales, aron ipasiugda ang pagkamahinungdanbon sa seguridad sa pagkaon ug nutrisyon.
Si Agnes Cecile B. Realiza, pangulo sa City Health Office, niingon nga mahinungdanon ang Nutrition Month isip usa ka kritikal nga plataporma aron masaka ang kasayuran ug seguridad sa nutrisyon alang sa tanang Oponganon.
“Kinahanglan sila ma-inform ug ma-aware nga importante gyud sa ila family ang pagkaon sa masustansya nga pagkaon ug ang balance diet,” matod ni Realiza.
Gikompirmar ni Realiza nga ang City Health Office adunay nagkalainlaing kalihukan nga gihan-ay sa tibuok bulan, lakip na ang mother craft nutrition classes, ug cooking classes sa matag barangay.
Humanon kini pinaagi sa usa ka seremonya sa paghatag og pasidungog karong Hulyo 31 alang sa mga mananaog sa nagkalainlaing kompetisyon.
Ang tumong sa kalihukan mao ang pagpalihok sa tanang sektor sa Lapu-Lapu City aron aktibong ipatuman ang Philippine Plan of Action for Nutrition ug amumahon ang usa ka mas himsog, mas nahibalo, ug mas lig-on nga komunidad.
Sa iyang bahin, si City Councilor ug Committee on Health Emilio Galaroza naghatag og gibug-aton sa importansya sa pagdasig sa mga bata nga mokaon og mga prutas ug utanon, lisod man apan gikinahanglan kini.
“It takes time, patience and effort to prepare nutritious foods for the children,”asoy ni Galoraza. / Antonette Caren Arrabis, CNU Intern