Nutrition Month saulogon sunod bulan
Karong sunod bulan sa Hulyo, ang National Nutrition Council (NNC 7) maoy manguna sa pagsaulog sa ika-51 nga Nutrition Month.
Giawhag nila ang mga magbubuhat sa polisiya ug uban pang hingtungdan nga himuong mas daling maabot ang mga pagkaong himsog.
Kining kampanya nga nagtumong sa pagsulbad sa problema sa seguridad sa pagkaon ug uban pang isyu sa nutrisyon sa Central Visayas, nagpahinumdom sa tanan nga ang pagbaton og igong luwas ug masustansya nga pagkaon usa ka batakang katungod sa tawo.
Bisan pa man nga gamay ra ang pagkunhod sa kaso sa malnutrisyon sa Central Vi-sayas sumala sa datos sa NNC 7, nagpabilin gihapon ang mga hagit tungod kay liboan ka mga bata sa rehiyon ang nag-antos gihapon sa kakulangan sa nutrisyon.
Sa usa ka press conference niadtong Biyernes, Hunyo 20, 2025, gibutyag ni Dr. Parolita Mission, ang Regional Nutrition Program Coordinator sa NNC 7, nga ang kampanya usa ka gipaambit nga responsibilidad.
Matod ni Mission nga ang porsyento sa stunting — usa ka kondisyon diin ang mga bata mubo ra kaayo sa ilang edad tungod sa kakulang sa saktong nutrisyon — mikunhod gikan sa 7.2 porsyento ngadto sa 6.7 porsyento karong tuiga.
Bisan pa niini, gipunting ni Dr. Mission nga kining porsyento nagpasabot pa gihapon sa gibana-banang 43,000 ka stunted nga bata sa rehiyon.
Samtang, ang mga kaso sa wasting o ubos nga gibug-aton alang sa gitas-on, nga kasagaran tungod sa grabe nga kakulang sa pagkaon, mikunhod og gamay gikan sa 1.4 porsyento ngadto sa 1.3 porsyento. Malipayon usab nga gipahibalo sa NNC 7 nga ang mga kaso sa overweight ug obesity sa mga bata mikunhod usab, gikan sa 2.11 porsyento ngadto sa duha ka porsyento.
Aron mas mapataas ang kahibalo ug mapalambo ang mas maayong nutrisyon, ang NNC 7 nag-andam og sunod-sunod nga kalihokan karong Hulyo alang sa ika-51 nga Nutrition Month nga kasaulogan.
Pormal nga magsugod ang mga kalihokan sa Hulyo 1, lakip na ang mga caravan, health forums, contest, ug information drive.
Gipasabot ni Dr. Mission nga ang undernutrition konektado sa kagutom tungod sa food insecurity, diin ang mga pamilya nabalaka kung asa gikan ang ilang sunod nga kaonon.
Ang kalisud sa pag-abot sa masustansya ug baratong pagkaon, inubanan sa nagsaka nga presyo sa batakang mga pagkaon, maoy nakatampo sa problema sa malnutrisyon.
Kini nga mga problema ka-sagaran makaapekto sa mga huyang nga grupo sama sa gagmay’ng bata, mabdos nga mga babaye, ug mga lumad.
Matod ni Mission, ang kampanya nagtinguha sa pagdasig sa mga komunidad ug mga lider sa Central Visayas nga molihok sa pagpatuman sa mga polisiya aron masulbad ang problema sa seguridad sa pagkaon ug nutrisyon. / EHP