Naangkon ni Filipino two-time Olympian EJ Obiena ang labing una niyang gold medal sa 2025 human niya napatigbabawan ang Meeting Metz Moselle Athletor sa France ning bag-uhay lang.
Si Obiena, kinsa nakakuha og silver medal sa International Jump Meeting Cottbus sa Germany si niaging semana, naka-clear og 5.70 meters aron patigbabawn ang eight-man tournament sa France.
“Merci Beaucoup Metz!!! Will take the season’s best and a dub!!! Now, time to sleep and get some much needed rest as we go back to it tomorrow!!!” pamahayag ni Obiena sa iyang social media post nga napatik sa www.abs-cbnnews.com.
Si Dutch Menno Vloon naka-clear sab og 5.70 meters apan nasipyat sa tiebreaker hinungdan nga nidakin-as siya sa ikaduhang dapit.
Nisakmit sa ikatulong dapit mao si American Christopher Nilsen, kinsa naka-clear og 5.60 meters.
Si Obiena, kinsa maoy kasamtangang world No. 4 pole vaulter, nisuway unta pag-clear og 5.85 meters apan napakyas siya sa iyang tanang pagsuway.
Ang 5.70 meters mao gihapon ang season best ni Obiena. / ESL