Bugtong si Filipino pole vaulter EJ Obiena ang napiling Athlete of the Year awardee sa San Miguel Corp.-Philippine Sportswriters Association (PSC) awards night.
Kini gumikan sa grabeng pagsulbong sa iyang kampanya sa 2023 diin nakalangkat siya og tulo ka gold medals sa nagkadaiyang mayorihiyang international competitions ug nakabuak siya og rekord sa Pilipinas.
Si Obiena, 28, nakakulit og kasaysayan sa World Athletics Championships isip labing unang Pinoy nga nahilakip sa halangdong six-meter club.
Sa iyang mga nakab-ot sa miaging tuig, nisulbong si Obiena sa No. 2 nga luna sa world rankings.
Siya sab ang labing unang Pinoy nga atleta nga naka-qualify sa umaabot nga 2024 Paris Olympics.