Si kanhi executive secretary Paquito Ochoa Jr. sa Lunes, Mayo 20, 2024, nihimakak nga gipugngan ang Philippine Drug Enforcement Agency (PDEA) sa pagpahigayon og anti-illegal drug operation nga nagtumong sa grupo sa mga indibidwal, apil ang kanhi senador Ferdinand Marcos Jr. ug beteranang aktres, Maricel Soriano, niadtong 2012.
Atol sa resumption sa Senate committee on public order and dangerous drugs inquiry sa giingong leak of confidential information gikan sa PDEA, si Ochoa niingon nga wa siya kaila nila ni kanhi PDEA deputy director general Carlos Gadapan ug ex-PDEA agent Jonathan Morales.
Si Morales, kinsa una nang nangangkon nga lehitimo ang na-leak nga mga dokumento nga naglambigit kang Marcos ug Soriano, ug uban pa, sa paggamit sa ilegal nga drugas, niingon nga si Ochoa nimando kang Gadapan nga dili na ipadayon ang operasyon niadtong 2012.
Matod ni Ochoa nga wa siya kahibawo sa maong mga dokumento ug naglibog siya nganong gilambigit siya ni Morales sa maong butang.
“As I earlier mentioned, I don’t even know him (Gadapan). And I don’t recall any occasion that we have met or even talked. So I completely deny that I have made those instructions as alleged,” matod niya.
Si Committee chairperson Senator Ronald dela Rosa niingon nga dunay mga “insinuation” nga gipugngan ni Ochoa ang drug operation batok kang Marcos tungod sa impluwensya sa iyang asawa nga si Liza Araneta-Marcos, nga kanhi niya partner sa usa ka law firm.
Kusganong gihimakak ni Ochoa ang maong mga “insulto” apan iyang giangkon nga si Liza usa sa iyang kauban sa MOST (Marcos, Ochoa, Serapio and Tan) Law Firm.
Matod niya nga ilang gitukod ang kompaniya niadtong 2006 apan ni-withdraw siya niini niadtong 2010 nunot sa iyang pagkatudlo isip executive secretary.
Sa laing bahin, ang panel ni-cite in contempt kang Morales ug nimando sa iyang detensyon tungod sa iyang giingong padayong pagpamakak sa mga butang nga may kalabutan sa iyang mga derogatory record sa dihang naa pa siya sa serbisyo sa kapulisan, nga wala niya ideklarar sa dihang ni-apply siya sa PDEA.
Una nang niingon si Morales nga napakyas siya sa pagdeklarar nga nataktak siya sa serbisyo sa kapulisan tungod kay wala siya masayod sa kahimtang sa iyang mga kaso niadtong higayona.
Sa sayo pa, gikataw-an ni Marcos ang nagpadayong imbestigasyon. / TPM / SunStar Philippines