Bisan aduna siya’y angol (double sprained ankle), nakadesisyon si Calvin Oftana nga mokuyog sa pagbiyahe sa Gilas Pilipinas paingon sa Jeddah, Saudi Arabia sa pamasin nga makaduwa siya sa Fiba Asia Cup.
Kon wala’y nausab, ang tibuok puwersa sa Gilas Pilipinas nakalarga na sa Miyerkules sa gabii, Hulyo 30, 2025, paingon sa Jeddah.
“Yes, he will be going,” matod ni Gilas deputy coach Richard Del Rosario human sa katapusang praktis sa Gilas sa Pilipinas sa Miyerkules sa buntag, nga napatik sa Spin.ph.
Sa sayo pa, giangkon ni Gilas coach Tim Cone nga 50-50 ang purohan nga makaduwa ang pambatong shooter sa TNT Tropang 5G human nasinati niini ang iyang pagkaangol atol sa Philippine Basketball Association (PBA) Season 49 Philippine Cup finals series tali sa Tropang 5G ug San Miguel Beermen.
Si Oftana ug ang pambatong higante sa Beermen nga si June mar Fajardo wala ningduwa sa Gilas atol sa 103-98 nga kadaugan niini batok sa Macau Black Bears sa usa ka sendoff game niadtong Lunes, Hulyo 28.
Wala niduwa si Fajardo ning sangkaa tungod kay sama ni Oftana, nagpaalim sab kini sa iyang angol (calf).
Hinuon, dili sama ni Oftana, seguradong makaduwa si Fajardo sa Fiba Asia Cup, nga ipahigayon karong Agusto 5-17.
Nanghinaot si Oftana nga sa dili pa mohamag ang Gilas sa labing una niining tahas sa prestihiyusong kompetisyon, hayan hingpit na siyang maalim.
Ang unang tahas sa Gilas sa torneyo gikatakda karong Agusto 6, sa alas 2:00 sa kadlawon (PH tme), batok sa Chinese Taipei.
Ang Gilas mokombati nga wala ang batan-ong higante nga si Kai Sotto, kinsa nakadesisyon nga dili mokuyog sa biyahe paingon sa Jeddah aron tutokan ang pagpaalim sa iyang ACL injury. / ESL