Sa ikaupat nga higayon sa 49th season, napili na sab si TNT Tropang 5G forward Calvin Oftana isip Philippine Basketball Association (PBA) Press Corps-Pilipinas Live Player of the Week awardee alang sa petsa Hunyo 25-29, 2025.
Dakong hinungdan niini mao ang maayong gipakitang duwa ni Oftana atol sa overtime nga kadaugan sa Tropang 5G batok sa Rain or Shine Elasto Painters, 113-105, sa Game 2 sa Philippine Cup semi-finals series niadtong Biyernes, Hunyo 27, 2025, sa Ninoy Aquino Stadium.
Ning maong duwa, naangol (hamstring) ang usa sa mga pambato sa Tropang 5G nga si Roger Pogoy hinungdan nga mas nibug-at ang obligasyon nga gipas-an ni Oftana.
Wala niatras si Oftana ug nagpakatap kini og 39 puntos aron agakon ang Tropang Giga sa kadaugan. / ESL