Grabe ka inilog ang Oklahoma City Thunder sa ilang pagpakigbatok sa Indiana Pacers sa 2024-25 National Basketball Association (NBA) Finals best-of-seven series nga sugdan karong Biyernes, Hunyo 6, 2025 (PH time), sa Paycom Center sa Oklahoma City.
Sa ESPN BET, ang Thunder nalista isip -750 nga inilog ning maong series samtang ang Pacers napatik isip +525 underdogs.
Nagpasabot kini nga ang pusta nga $750 alang sa Thunder igo lang modaog og $100 samtang ang pusta nga $100 alang sa Pacers modaog og $525.
Ang pagkainilog sa Thunder batok sa Pacers maoy usa sa mga labing dako nga diperensya sa NBA Finals sa ninglabay nga 20 ka tuig.
Gikan niadtong 2005, ang 2017-18 Golden State Warriors lang ang naglabaw sa grabe pagkainilog sa kasamtangang Thunder.
Niadtong tuiga, ang Warriors napatik nga -1075 nga inilog sa NBA Finals batok sa Cleveland Cavaliers.
Sa niaging 50 ka tuig, duha ra ka teams nga nalista isip +200 underdogs sa NBA Finals ang ninglampos pagsakmit sa kampyunato ug kini mao ang 2003-04 Detroit Pistons (+500) ug 2018-19 Toronto Raptors (+230).
Kon mao kini ang basihan, gamay ra kaayo ang purohan sa Pacers nga molampos ning maong series.
Bisan unsa’y narehistro sa purohan sa online betting, gilaumang kulbahinam ug gikahinaman gihapon kining maong panagparang hilabi na kay parehong hidlaw sa kampyunato ang duha ka batan-ong mga puwersa.
Ang prangkisa sa Thunder nakaangkon og usa pa lang ka korona niadtong 1979 dihang nagbase pa sa Seattle ang team ug gitawag kini og Supersonics samtang ang Pacers wala pa sukad nakabaton og titulo.
Sa duha nila ka mga engkuwentro sa regular season, gipangmakmak sa Thunder ang Pacers, 120-114, niadtong Disyembre 27, 2024, ug 132-111 niadtong Marso 30, 2025.
Ang duha ka mga kampo parehong adunay pambatong trayanggulo. Gipangtumbok mao sila si Shai Gilgeous-Alexander, Jalen Williams, ug Chet Holmgren sa Thunder samtang sila si Tyrese Haliburton, Aaron Nesmith, ug Pascal Siakam sa Pacers. / Gikan sa wires