Ang Olympic gold medalist nga si Imane Khelif sa Algeria kinahanglan moagi og genetic sex screening aron makaduwa sa mga umaabot nga torneyo human gipahibalo sa World Boxing.
Gianunsiyo sa bag-ong namuon sa boksing nga kinahanglan na karon og mandatory sex testing ang tanang atleta. Giklaro pa gyud nila nga apil sa maong palisiya si Khelif nga moagi gyud og test una siya tugotan moduwa, lakip na sa Eindhoven Box Cup nga ipahigayon sa Netherlands sunod bulan.
Si Khelif nakadaog og gold medal sa Paris Olympics, apan nasentro siya sa kontrobersiya kauban si Lin Yu-ting sa Taiwan, nga usa sab ka gold medalist.
Ang kanhi pangulo sa Olympic boxing, ang International Boxing Association nga gi-dominar sa mga Ruso, nagdisqualify nilang duha niadtong 2023 World Championships tungod kay wala sila kapasar sa usa ka eligibility test — pero hangtod karon, wala gibutyag unsang klase nga test. / RSC