GISUWAYAN sa Cebu City hall ang pagpatuman sa online attendance system aron ang mga empleyado dili na kinahanglang molinya og taas panahon sa pag time-in ug pag time-out ug nga makasugod dayon og trabaho.
Gi-pilot lang una ang sistema sa duha ka departamento.
Kon mapamatud-an nga epektibo, kini ipatuman sa tanang departamento sa City Hall aron ma-standardize ang pagsubay sa attendance ug mamenusan ang nasayang nga oras.
Atol sa department meeting nga gipahigayon human sa flag ceremony niadtong Lunes sa buntag, Hulyo 21, 2025, gituki ni Mayor Nestor Archival Sr. ang panginahanglan alang sa “continuous improvement” sa mga operasyon sa gobiyerno.
Iyang nahinumdoman ang iyang pagbisita sa Japan niadtong 1984, diin iyang naobserbahan kon giunsa bisan ang pinakagamay nga kausaban sa sistema sa trabaho makahatag og mahinungdanong kalambuan sa trabaho.
Matod ni Archival, kini nga panghunahuna kinahanglan i-apply sa City Hall gikan sa pagdumala sa oras ug pagtambong sa miting ngadto sa kinatibuk-ang workflow ug productivity sa empleyado.
“If there are 50 people and each person wastes two hours a day, we’re actually wasting millions of pesos,” sumala sa mayor.
Sa kasamtangan, ang mga regular ug casual nga empleyado sa City Hall naggamit og biometric scanners alang sa ilang attendance, samtang ang mga job order (JO) nga empleyado nagsalig gihapon sa manual punch cards.
Aron masulbad ang isyu, gisugdan na sa Human Resource department ang pag-testing sa usa ka mobile-based attendance app nga nagtugot sa mga empleyado nga maka-log in ug out gamit ang ilang mga selpon.
Ang app mo-record usab sa lokasyon sa tiggamit. / Ericka May Charcos, HNU Intern