Gidili sa kagamhanan sa Siyudad sa Lapu-Lapu ngadto sa tanang kawani ug mga opisyal sa pag-apil sa online gambling atol sa oras sa trabaho.
Si Mayor Ma. Cynthia “Cindi” Chan nipirma sa Memorandum No. 2025-032 niadtong Miyerkules, Agusto 13, 2025, labot sa maong pagdili.
Ang kamanduan sa mayor naghingpit sa pagdili sa online gambling alang sa tanang Department of the Interior and Local Government (DILG) personnel ug mga opisyal sa local government unit (LGU).
Sa usa ka press briefing niadtong Huwebes, Agusto 14, si Chan niingon nga ang maong mando nahiuyon sa DILG Memorandum Circular No. 2025-082, nga nagdili sa mga opisyal sa LGU, elected man o appointed, sa pag-access o pag-apil sa bisan unsang matang sa online gambling.
Ubos sa memorandum, ang online gambling naglakip sa tanang matang sa sugal nga gibase sa internet, gawas lamang niadtong gipadagan ug gi-regulate sa Philippine Charity Sweepstakes Office (PCSO), sumala sa Section 4 sa DILG Memorandum Circular 2025-082.
Gipahayag niya ang dako nga negatibong epekto sa online gambling sa mga pamilya ug sa kaepektibo sa trabaho. Gihatagan niya og gibug-aton nga ang memorandum giisyu aron makatabang sa pagpugong ug pagpaminus sa online gambling nga kinaiya sa mga empleyado.
Ang mga empleyado sa City Hall nga masakpan nga nag-online gambling mag-atubang og hugot nga administratibong silot ug posibleng kasong kriminal.
Gitahasan ni Chan ang mga department head nga maoy mag-monitor sa ilang mga sakop apil na ang mga job order ug contractual nga empleyado.
Siya nidugang nga gusto niya nga maapil usab ang mga field worker sa proseso sa pag-monitor.
Ang balikbalik nga mga kalapasan moresulta sa pagkalagpot sa trabaho. / DPC