Gimanduan sa Bangko Sentral ng Pilipinas (BSP) ang mga service provider sa electronic wallet (e-wallets) nga tangtangon ang tanang icons ug links nga modirekta sa mga tiggamit ngadto sa online gambling platforms sulod sa 48 oras.
Atol sa hearing sa Senate Committee on Games and Amusement niadtong Huwebes, Agusto 14, 2025, si Deputy Governor Mamerto Tangonan niingon nga ang pormal nga direktiba alang sa mga e-wallets nga putlon ang koneksyon gikan sa mga gambling applications ipagawas sulod sa maong adlaw.
“The monetary board of the [BSP] has approved our policy that we asked or we order, direct the BSP supervising institutions to take down and remove all icons and links redirecting to gambling sites,” matud ni Tangonan.
Ang tsirman sa komite, si Senador Erwin Tulfo, niingon nga iyang i-contempt si Tangonan kon ang mga e-wallets aduna pa gihapoy koneksyon sa mga online gambling applications karong Dominggo, Agusto 17, tungod sa “krisis” sa nasod tungod sa web-based gambling operations.
Si Tulfo niingon nga bisan pabor siya sa pagpahamtang og total ban sa online gambling, abli gihapon siya sa pagpamati sa mga posisyon sa tanang apektado nga mga stakeholders.
Sa pagkakaron, adunay tulo ka Senate bills nga nagtinguha sa total ban sa online gambling sa nasod, samtang ang duha pa nagtawag lang sa pagpahamtang og mas estrikto nga regulasyon.
Sa iyang opening statement, si Senador Pia Cayetano, usa sa mga author sa mga balaodnon nga nagtinguha sa total ban sa online gambling, nikutlo sa ubay-ubay nga mga indibidwal nga naghikog tungod sa utang sa sugal.
Si Cayetano niingon nga sa 2023, usa ka nationwide survey nagpadayag nga 66 porsiyento sa mga Pilipino nga nag-edad og 18 hangtod 24 ang nalambigit sa online gambling, uban sa kanunay nga pagpusta nga kinaiya nga niresulta sa pagpabaya sa pag-eskwela, kalisod sa pinansyal, ug psychological strain.
Si Cayetano niingon nga sa 2020, ang gross gaming revenue sa nasod niabot sa P12.91 bilyon; sa 2021, P16 bilyon; ug sa 2022, P30 bilyon.
Matod niya nga sa 2023, ang gaming revenue nidoble ngadto sa P58 bilyon, ug sa 2024, nitriple kini ngadto sa P154 bilyon. / TPM / SunStar Philippines