Usa ka suspetsadong online scammer nga wanted sa kasong estafa, nipauli kay mamasko sa ilang dapit, nadakpan sa kapulisan sa Carcar City Police Station, alas 11:25 sa gabii sa Huwebes, Disyembre 21, sa Barangay Poblacion 3.
Si Junly Regis Gonzales, 24, taga Sitio Ibabao, Brgy. Perrelos, Carcar, nasikop pinasikad sa warrant of arrest sa kasong estafa nga giisyo ni Judge Joy B. Bolivar sa MTCC Carcar City nga gipetsahan og Nobiyembre 14, 2023.
Hinuon, ang korte mitugot sa akusado nga makabutang og P18,000 nga piyansa.
Si Police Lt. Col. Pedy Noval, hepe sa Carcar City Police Station nga nahinabi sa Superbalita Cebu, nagkanayon nga ang akusado nipauli kay mamasko human taudtaod na nga nagtago human gireklamo sa mga silingan nga naka-invest sa usa ka paluwagan niini ug online e-loan.Kadtong ningbutang sa ilang puhunan, pasaligan niya nga dunay 20 porsiyento ang tubo nga nga kita.
Kalit lang nahanaw ang akusado sa ilang dapit human giingong nakailad og daghan.