Nangayo og tabang sa Cebu City Council ang operator sa modernong public utility vehicle (MPUV) ilabi na sa mga obligasyon sa buhis sa negosyo, human kini temporaryong mihunong sa ilang operasyon sukad niadtong Oktubre 1, 2023.
Ang Persano Corp., Cebu-based operator sa Bagong Jeep (Beep), nagsulat ngadto sa Konseho nga hatagan og relief o exemption sa mga silot o surcharge kalabot sa mga obligasyon sa buhis sa negosyo nga nakasinati sa kalisdanan.
Ang tagdumala sa Beep unang nipagawas og pahibalo sa Septiyembre 22, 2023, bahin sa desisyon nga temporaryong ihunong ang operasyon.
Sa nangaging taho sa SunStar Cebu, gitumbok sa Beep ang mga nag-unang hinungdan sa ilang temporaryong paghunong sa operasyon.
Sama sa kalisod sa pagpalit og spare parts sa ilang units gikan sa Russia tungod sa nagpadayong panagbangi tali sa Ukraine.
Lakip sa ilang gitumbok mao ang pagkalangay sa paghatag sa ilang hangyo alang sa rota o extension modifications.
Dugang pa, ang nagpadayong Bus Rapid Transit (BRT) construction nga nakaapekto sa rota sa Beep gikan sa Guadalupe ngadto sa Carbon.
Ug ang epekto sa mga special permit nga gihatag sa ubang kaatbang nga modernong public utility jeepneys gikan sa Cebu City Hall ngadto sa IT Park sa Barangay Apas ug gikan sa Banawa ngadto sa Sitio Panagdait sa Barangay Kasambagan.