Pormal na nga nipasaka og kaso ngadto sa piskalya ang Police Regional Office 7 ug ang Anti-Cyber Crime Group batok sa operator sa usa ka scam hub nga nahimutang sa Barangay Kasambagan, Siyudad sa Sugbo.
Kalapasan sa Republic Act 10175 kun ang Cybercrime Prevention Act ang gipasaka nga kaso niadtong Hulyo 4, 2025, batok sa gitumbok nga operator sa scam hub nga si alyas "Tonying", taga Barangay Lahug sa Dakbayan sa Sugbo.
Siya nag-atubang og mga kasong kalapasan sa Section 8 ug 28 sa Republic Act 8799 kun (Securities Regulation Code) ug Section 11 kun (Investment Fraud) sa RA 11765 kun (Financial Products and Services Consumer Protection Act).
Kini maong mga kalapasan nalambigit sa Section 6 sa RA 10175 (Cybercrime Prevention Act).
Sa laing bahin, laing tulo ka individual nga nag-alyas og Lerang, Yanyan ug Jeje gipasakaan og kaso sa kalapasan sa Section 11 of RA 11765 nga dunay connection sa Cybercrime Prevention Act niadtong Hulyo 11.
Ang mga gipangtumbok lumolupyo sa Balamban, Compostela ug Dakbayan sa Sugbo.
Nagpadayon ang gihimong imbestigasyon sa kapulisan aron sa pag ila pa sa laing mga personalidad nga nalambigit sa illegal nga kalihukan.
Base sa kuha sa CCTV footage nga nasakmit sa kapulisan sa establisamento diin sila nag-operate sa ilang scam, makita nga aktibo sila nga apil sa kalihukan sa kompanya nga nagpahigayon og scam hub.
Ang mga imbestigador padayon sa pagtandi sa ilang pagkatawo pinasikad sa digital nga mga ebidensya ug personnel records nga naa na sa kustodiya sa PRO-7 alang sa pagpasaka og dugang mga kaso.
Kon mapamatud-an nga sad-an, mahimong mag atubang sila og silot nga 21 ka tuig nga pagkabilanggo ug multa nga moabot sa P5 million, depende sa kaso niini ug sa hukom sa korte.
Ubos sa Securities Regulations Code and Financial Products and Services Consumer Protection Act, ang investment fraud ug unregistered securities dealings makonsiderar nga usa ka seryusong financial crime ug kon ang krimen nahimo pinaagi sa online nga platforms, makasamot pa kini sa kaso ubos sa Cybercrime Prevention Act. / AYB