Dear Atty. Joan,
Ako si Fey, 15 anyos, nagpuyo sa Dakbayan sa Sugbo. Sa miaging adlaw, niuban ako sa akong higala nga babaye ug sa iyang mga kaila aron sa pagselebrar sa kalampusan sa mga bag-ong ninggraduwar sa kolehiyo nga ila usab nga mga higala. Gipa-ilaila sa akong higala ang mga tawo nga nagtapok ug nagkapamilyar kami sa usa’g usa.
Niabot sa punto nga nagsugod og suka-suka ang akong amigang nahubog maong nisulti ko nga mopauli na kami apan nitanyag ang usa ka lalaki nga ihatod na lang mi niya pauli kay duna man siya’y sakyanan. Niinsister man pud ang tag-iya sa balay maong nisugot na lang pud mi ug nisakay nila padung pauli.
Namatikdan nako nga lahi ang dalan nga ilang giagian ug mao nga giingnan nako sila nga manaug na lang mi sa sunod nga duha ka eskina. Didto nagsugod ang tanan. Gihikaphikap sa usa ka lalaki ang akong batiis ug niingon nga sayo pa daw ang gabii para mouli. Nahadlok na jud ko pag-ayo ato pero nitubag gihapon ko’g matinahoron.
Sa pagkanaog namo sa among gisakyan, ninaog usab ang duha ka mga lalaki ug nitabang pag-agak sa akong amiga nga nahubog bisan paman sa akong pagdumili. Giingnan na lamang ako sa akong amiga nga mag-una sa balay. Usa ka oras ang milabay, nahiuli akong amiga nga gubot kaayo ang buhok.
Pagkasunod adlaw, naghilak siya nga nagsulti kanako nga gilugos siya.Nakahilak na lang ko og apil niya ug nagbasol nganong miuna ako sa pagpauli bisan pa nga nasayod ako nga hubog siya niadtong higayona. Wala kami masayod ug unsay angay namo nga buhaton, naglibog na kami ug asa kami mopaingon.
Atty. Joan, tabangi ug tambagi intawon ako og unsay angay namo nga buhaton aron mahatagan og hustisya ang nahiagoman sa akong suod nga higala.
Imong magtatampo,
Fey
Dear Fey,
Salamat sa pagsunod niining lindog ug maayong adlaw diha kanimo. Angay nga pasakaan og kaso sa imong amiga kining mga tawhana og rape apan dapat kini nga susihon kon masulod ba kini sa paglapas sa Statutory Rape Law nga magdepende kon ang edad sa imong amiga ubos sa 16 anyos, ang balaod sa Statutory Rape adunay mas taas ug bug-at nga silot kaysa Rape ubos sa RA 8353.
Basi sa Republic Act 11648, ang Statutory Rape o ang paglugos sa mga menor de edad gisaka gikan sa 12 anyos ngadto sa 16 anyos. Basi sa imong suwat, ang imong amiga gipanamastamasan nga ubos sa impluwensya sa alcohol o hubog siya niadtong higayona.
Sa laing bahin, kon dili ubos sa 16 anyos ang edad sa imong amiga makonsedirar gihapon kini nga rape batok sa usa ka tawo nga gihikawan sa rason sama sa imong amiga nga ubos sa impluwensya sa alkohol.
Ang angay nimo nga pagabuhaton mao kini, ilista ang mga ngalan o ihulagway ang mga lalaki nga inyong gikauban niadtong gabhiona, hilabi na gayud kadtong duha ka mga laki nga ningdungan sa pagkanaog ninyo ug sa imong amiga sa inyong pagpamauli.
Pangutan-a imong amiga kon unsa ang nahitabo ug i-report ang insidente sa labing duol nga istasyon sa pulis aron mahimo ang dugang imbestigasyon aron mapasaka ang kasong rape sa labing dali nga panahon.
Hinaot nga nakatabang kini kanimo ug sa imong amiga Fey.
Daghang Salamat.
Imong alagad,
Atty. Joan
[Para sa mga komento, suhestiyon o kung ganahan mosugyot sa ilang suliran, mahimong mocontact sa Children’s Legal Bureau, Inc. pinaagi sa among hotline number 09653804620. Mahimo pud nga mocontact pinaagi sa online legal assistance form nga naa sa among Children’s Legal Bureau FB page.]