Dear Atty. Joan,
Maayong adlaw kanimo!
Ako si Perla, duna koy anak nga hinganlan lang nato og Mika, Grade 5 student kini sa usa ka pampubliko nga tunghaan.
Nabatian nako kagabii nga naghilak si Mika sa iyang kwarto. Sa akong pag-pakisusi kon naunsa kini, gusto na kuno niya nga mobalhin og laing tunghaan.
Ako siyang gipangutana og unsay rason ngano mobalhin man siya? Iyang gisugid kanako nga pirmi siyang makadawat og mga dili maayong pulong gikan sa iyang classmates ngadto sa ilang group chat sa Facebook Messenger.
Gusto lang unta ihilom ni Mika ang maong panghitabo kay nahadlok siya nga lagmit mosamot lang ang gipanghimo sa iyang classmates ngadto kaniya.
Busa, mangutana lang unta ko Attorney Joan kon unsa ang angay namo nga himuon ani nga sitwasyon kay nahitabo man kini pinaagi sa online? Pwede ba kami moduol sa barangay?
Imong magtatampo,
Perla
Dear Perla,
Maayong adlaw usab kanimo Perla ug sa tanang nagsunod niining atong lindog.
Basi sa Anti-Bullying Act of 2013, ang inyong angay nga buhaton mao kini, i-report ang panghitabo sa school principal o school officer aron ila kining maimbestigahan.
Ang Implementing Rules and Regulations sa maong balaod nagadili sa pagduol sa barangay kon ang tumong sa reklamo mao ang bullying o cyberbullying kay kini nga isyu sa tunghaan lamang angay nga husayon. Gawas kon anaay mga reklamo nga nakalapas sa ubang mga balaod, adto kini i-refer sa mga ahensya sa goberno nga maoy nagtutok niini.
Hinaot nga ang akong tambag nakahatag kanimo og giya kon unsay angay nimo nga buhaton, Perla.
Daghang salamat.
Imong alagad,
Atty. Joan
Para sa mga komento, suhestiyon o kung ganahan motampo sa inyong mga suliran, mahimo nga mokontak sa CLB, Inc. pinaagi sa hotline number 09653804620. Mahimo nga mokontak pinaagi sa Online Legal Assistance Form nga anaa sa CLB FB page.