DUL-AN otsenta ka mga pulis sa Tungang Kabisay-an maoy mitambong sa Enhancement Training alang sa pag-imbestigar ug pagsang-at og mga kaso sa online child sexual exploitation ug pagpanalipod sa mga bata nga giorganisa sa CLB. Gikan sa Disyembre 6 hangtod 10 karong tuiga, mga sakop sa Women and Children’s Protection Desk (WCPD) sa nagkalainlaing stasyon sa kapulisan maoy partisipante sa maong enhancement training. Sa maong kalihokan, dunay mitambong lang online ug duna poy miadto mismo sa Golden Peak Hotel and Suites sa Dakbayan sa Sugbo. Hinuon, hugot nga gipatuman ang minimum public health standards aron malikay sa Covid-19. Kining maong enhancement training usa ka resulta sa partnership sa CLB ug sa Terre Des Hommes Netherlands (TDHNL), usa ka international children’s rights organization. Sa pipila ka adlaw nga gitapok ang mga pulis, nakat-onan nila ang mga importanteng matang aron mas mahimong hapsay ug epektibo ang ilang pagtubag sa hagit sa online child sexual exploitation. Nahimong resource speakers ang mga abogada sa CLB nga silang Atty. Joan Dymphna Saniel-Amit, Executive Director ug Atty. Noemi Truya-Abarientos, Executive Director. Gawas sa CLB lawyers, mihatag pod og diskusyon ang mga representante gikan sa International Justice Mission (IJM), Regional Anti-Cybercrime Unit, TDHNL, ug Vicente Sotto Memorial Medical Center (VSMMC). Si Honorable Judge Ramon B. Daomilas, Jr. sa Regional Trial Court (RTC) Cebu City maoy nangulo sa pagpasabot sa regulasyon kabahin sa mga cyber warrants ug sa pag-handle sa ebidensya ingon man ang pagtubag sa legal concerns kabahin ini. Usa sa highlights sa maong training mao ang pagtudlo sa mga pulis ug paghimo sa saysay sa mga testigos o biktima. Si Deputy Cebu City Prosecutor Maria Theresa Casiño maoy nihatag sa maong pagtulun-an. Gi-assess sab ang mga hinimo nga affdavits sa kapulisan sa katapusang adlaw. Malaumon sa CLB nga pinaagi sa maong training, makatabang kini sa pagpalig-on sa pagsang-at og mga kaso batok sa mga suspek o akusado sa mga kasong mahimong isang-at sa mga mamumuno sa online child sexual exploitation. Nanghinaot sab ang maong organisasyon nga magtinabangay sa umaabot ang kapulisan ug ang CLB sa pagwagtang ug pagkunhod sa mga kaso sa pagpangabuso ug pagpanghimulos sa mga bata. [Lindog sinuwat ni Atty. King Anthony Perez, usa sa mga abogado sa Children’s Legal Bureau. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]